Էրդողանն արգելել է ադրբեջանցի գործարարի ձերբակալման մասին իրեն հարցեր ուղղել

Թուրքիայի նախագահ Ռեջեփ Թայիփ Էրդողանն արգելել է որևէ հարց տալ իրեն ԱՄՆ-ում ձերբակալված ադրբեջանցի գործարար Ռեզա Զարրաբի մասին:

Ըստ Demokrathaber-ի՝ Էրդողանի կողմից այդ առնչությամբ նոր փոփոխություններ են մտցվել, համաձայն դրանց` այսուհետ նա նախօրոք կստուգի և կհաստատ լրագրողների՝ իրեն ուղղվելիք հարցերը և չհավանելու դեպքում անձամբ կհեռացնի հարցը:

Էրդողանը նման որոշում է կայացրել, երբ լրագրողներից մեկը Զարրաբի ձերբակալման մասին հարց է ուղղել: «Մենք ի՞նչ գործ ունենք»,- ի պատասխան ասել է Էրդողանը:

Նշենք, որ Թուրքիայում 2013 թվականի դեկտոմբերի 17-ին «Մեծ կաշառք» գործողության ընթացքում ձերբակալված Զարրաբը Էրդողանի ջանքերով ազատ էր արձակվել: Ինչպես Զարրաբը, այնպես էլ Էրդողանի որդին՝ Բիլալը, ու մի շարք բարձրաստիճան պաշտոնյաների որդիներ մեղադրվում էին կոռուպցիայի և խարդախությունների մեջ: