Չարորակ գոյացությունների բուժման համար կստեղծվի ճառագայթային կենտրոն

Այսօր կառավարության նիստում առողջապահության նախարար Արմեն Մուրադյանը ներկայացրեց որոշում «Ճառագայթային բուժման կենտրոն» ՓԲԸ ստեղծելու մասին: Ճառագայթային բուժօգնության ժամանակակից կենտրոնի ստեղծումը պայմանավորված է ուռուցքաբանության կենտրոն ստեղծելու մասին կառավարության որոշմամբ հաստատված եռափուլ ծրագրով և նպատակ ունի կանխել չարորակ նորագոյացությունների տարածվածությունը ու դրանով պայմանավորված մահացությունները: Նախարարը նշեց, որ ճառագայթային բուժումը չարորակ գոյացությունների բուժման տարածված ու արդյունավետ միջոցներից է:

Ճառագայթային բուժում Հայաստանում իրականացվում է միայն երկու բուժհաստատությունում, որոնք չեն կարողանում ապահովել անհրաժեշտ պահանջարկը, և որոնց տեխնիկական հագեցվածությունը բավարար չէ: Առաջարկվում է Համաշխարհային բանկի ֆինանսավորմամբ վարկային ծրագրի շրջանակներում ստեղծել «Ճառագայթային բուժման կենտրոն», որը հագեցած կլինի անհրաժեշտ բուժսարքավորումներով և կհամապատասխանի համաշխարհային չափանիշներին: Կենտրոնը կսպասարկի առնվազն 1000 հիվանդի՝ հեռահար բուժմամբ, ինչպես նաև 400 հիվանդի՝ թերապիայի համար: 

«Կենտրոնը լինելու է 100 տոկոսով պետական մասնակցությամբ ընկերություն, որի բաժնետոմսերի կառավարման լիազորությունը վերապահվելու է առողջապահության նախարարությանը»,- ասաց Արմեն Մուրադյանը: