Նոր հորիզոններ գիտնականների համար. գիտական ծրագրերի ինտեգրմանն աջակցելու կենտրոն կստեղծվի

Վաղը կառավարության նիստում կքննարկվի «Գիտական ծրագրերի ինտեգրմանն աջակցության կենտրոն» հիմնելու հարցը: Ըստ նախագծի` հիմնադրամը կկառավարի ԿԳՆ գիտության պետական կոմիտեն:

Հիմնադրամը կհամակարգի «Հորիզոն 2020»-ին ՀՀ-ի անդամակցության հարցերը, կտրամադրի խորհրդատվություն` Եվրոպական հանձնաժողովի կողմից ֆինանսավորվող ծրագրերի վերաբերյալ ՝ կապված մասնակցության ֆինանսական և իրավաբանական ասպեկտների հետ, ինչպես նաև նյութական կամ խորհրդատվական աջակցություն կցուցաբերի` իր ծրագրերի իրականացմանը մասնակցող կազմակերպությունների գործունեության զարգացմանն ուղղված:

Հիմնադրամի գործունեության հիմնական նպատակներից է գիտության, կրթության, տեխնոլոգիաների և նորարարության ոլորտներում Եվրոպական հանձնաժողովի կողմից ֆինանսավորվող ծրագրերին ՀՀ-ում գիտական գործունեություն իրականացնող կազմակերպությունների և առանձին գիտնականների մասնակցության ծավալների ավելացումը: Բացի այդ, հիմնադրամը պետք է նպաստի նաև «Հորիզոն 2020» ծրագրի հնարավորությունների օգտագործմամբ գիտության, կրթության, տեխնոլոգիաների և նորարարության ոլորտներում նոր ձեռքբերումներին, առանձին գիտնականների հնարավորությունների առավելագույնս օգտագործանը Հայաստանի համար:

Կառավարության նիստում հիմնադրամի ստեղծման հարցը կներկայացնի ՀՀ ԿԳ նախարար Լևոն Մկրտչյանը: