ԱՄՆ Հայ Դատի հանձնախումբը կոնգրեսականներին և սենատորներին ներկայացրել է Հայաստանի եւ Արցախի ֆինանսական օգնության ծրագիրը

ԱՄՆ Հայ Դատի հանձնախմբի օրենսդրական հարցերով տնօրեն Րաֆֆի Քարաքաշյանը ԱՄՆ Կոնգրեսի Ներկայացուցիչների պալատի և Սենատի անդամներին ներկայացրել է 2017 թվականին Հայաստանին և Արցախին արտաքին ֆինանսական օգնության ծրագիրը: Այդ մասին տեղեկացնում է Ամերիկայի Հայ Դատի գրասենյակը:

Քարաքաշյանը առաջնահերթ է համարել՝

1. Արցախին տրամադրվող ֆինանսական օգնության բարձրացումը, այդ թվում՝ Ստեփանակերտում Քերոլայն Քոքսի վերականգնողական կենտրոնի համար, որը ծառայում է ավելի քան 1000 երեխաների և չափահասների, ովքեր ունեն ֆիզիկական և մտավոր խնդիրներ:
2. Բաքվին հատկացվող ֆինանսական օգնության զրոյացում, մինչև Ադրբեջանը չհամաձայնի շփման գծից հետ քաշել դիպուկահարներին և ծանր տեխնիկան, դադարեցնի միջսահմանային հարձակումները, վերջ դնի պատերազմը վերսկսելու իր սպառնալիքներին, համաձայնի հակամարտությունը լուծել խաղաղ ճանապարհով:
3. 10 մլն դոլարի չափով օգնություն տրամադրել Հայաստանին երկրում ապաստան գտած սիրիացի փախստականների աջակցելու համար:

 Բացի այդ` Հայաստանի բարեկամները Ամերիկայի բոլոր ծայրերից էլեկտրոնային փոստով Կոնգրեսում իրենց ներկայացուցչին կոչ են արել միանալ Դոլդի եւ Փալոունի նամակին (anca.org/aid and anca.org/call), որը նույնատիպ դրույթներ է պարունակում Հայաստանին հատկացվող օգնության մասին։ Ակնկալվում է, որ այդ նամակը կուղարկվի այս շաբաթ: