Դավիթ Հարությունյանը ներկայացրեց Ընտրական օրենսգրքի նախագծի մանրամասները

Այսօր կառավարության նիստում կառավարության աշխատակազմի ղեկավար-նախարար Դավիթ Հարությունյանը կառավարության հաստատմանը ներկայացրեց ԸՕ նախագիծն ու հարակից օրենքների փոփոխությունները: Առաջարկվում է, որ  Գյումրի և Վանաձոր քաղաքների համայնքային ընտրությունները տեղի ունենան անուղղակի` Երևանի մոդելով, և ըստ Հարությունյանի` ցանկը հետագայում կընդլայնվի: Հաջորդ կարևոր փոփոխությունը ԱԺ-ի ձևավորումն է, որը համամասնականի արդյունքում է ձևավորվելու, այսինքն` մեծամասնական ընտրակարգ այլևս չի լինելու: Մյուս կարևոր փոփոխությունը ԿԸՀ-ի ձևավորումն է. արմատապես փոխվել է ձևավորման կարգը, ԿԸՀ-ն  պետք է ձևավորվի ԱԺ-ի կողմից:

Ըստ Դավիթ Հարությունյանի` սահմանադրական փոփոխությունները նոր հասկացություն մտցրեցին քաղաքական մշակույթում, այն է՝  կայուն խորհրդարանական մեծամասնություն: «Ի՞նչ է կայուն մեծամասնությունը, Սահմանադրությունը չի սահմանել, այն պետք է սահմանվի ԸՕ նոր օրենսգրքում: Մենք առաջարկում ենք կայուն մեծամասնություն համարել ԱԺ պատգամավորների թվի 54 տոկոսը»,- ասաց նախարարը:

Ինչ վերաբերում է համամասնական ընտրական համակարգին, պետք է հաշվի առնել, որ մոդելները բազմաթիվ  են: Դավիթ Հարությունյանի խոսքով`  կարող էր առաջանալ մի խնդիր, երբ օտարվում են ընտրողը և ընտրվածը, որովհետև համամասնականով ընտրված պատգամավորները չեն ներկայացնում Հայաստանի որևէ սպեցիֆիկ հատվածի ընտրողների շահերը, այլ` ամբողջ հանրապետությունը: Որոշվել է մշակել համամասնական ընտրակարգի այնպիսի մոդել, որ, ապահովելով համամասնական մոդելի բոլոր առավելությունները, այնուամենայնիվ, երաշխավորվի, որ ընտրողը իմանա, թե ով է իր պատգամավորը, ում կարող է դիմել, ում կարող է ներկայացնել իր քաղաքական պահանջները, ում միջոցով է արտահայտելու իր ձայնը խորհրդարանում:

«Ո՞րն է լուծումը: Լուծումն այն է, որ ՀՀ-ն բաժանվում է 13 ընտրական տարածքների, և յուրանաչյուր ընտրական տարածքում մասնակից կուսակցությունները ներկայացնում են իրենց ընտրական ցուցակը, որը բնորոշ է հենց այդ ընտրական տարածքին: Համամասնական մոդելի մյուս բալանսավորված տարբերակը ապահովվելու է մեկ այլ սկզբունքի հիման վրա, երբ պատգամավորների 50 տոկոսը ներկայացված են լինելու տարածքներից, իսկ մյուս 50 տոկոսը` համապետական ցուցակից»,- ասաց Դավիթ Հարությունյանը: