Սպառողները պատշաճ որակի ապրանքը հետ վերադարձնելու կամ փոխանակելու իրավունք կունենան

Այսօր կառավարության նիստում էկոնոմիկայի նախարար Արծվիկ Մինասյանը ներկայացրեց «ՀՀ քաղաքացիական օրենսգրքում փոփոխություն և լրացումներ կատարելու մասին», «Հսկիչ-դրամարկղային մեքենաների կիրառման մասին» օրենքում լրացում կատարելու մասին», «Առևտրի և ծառայությունների մասին» Հայաստանի Հանրապետության օրենքում լրացումներ կատարելու մասին», «Սպառողների իրավունքների պաշտպանության մասին» օրենքում փոփոխություն և լրացում կատարելու մասին օրենքների նախագծերի փաթեթը:

Նախարարը նշեց, որ երկու հարց է կարգավորվում: Առաջինը վերաբերում է էլեկտրոնային առևտրի իրավակարգավորումների առանձնահատկություններին, որով հնարավորություն է տրվում հստակ սահմանել այն պայմանագրային հենքը, որը հնարավորություն է տալու կազմակերպել առևտուրը: Երկրորդը՝ սահմանել իրավունքներն ու պարտականությունները նաև օպերատորի մասով:

Կարգավորվում են նաև սպառողների իրավունքները` հնարավորություն տալով հետայսու պաշտպանել սպառողների իրավունքները ոչ միայն ոչ պատշաճ որակի ապրանքը վաճառելու, այլ նաև պատշաճ որակի ապրանքը փոխանակելու կամ հետ վերադարձնելու մասով: Առ այսօր եղած իրավակարգավորումները թույլ չէին տալիս, որպեսզի պատշաճ որակի ապրանքը հետ վերադարձվի, գումարը հետ վերցվի: