Մենք արժանի գնահատական չստացանք.Գեորգի Գալուստյան

Պատանեկան օլիմպիական խաղերի Հայաստանի ներկայացուցիչ` գեղասահորդ Անաստասիա Գալուստյանի գլխավոր մարզիչ` Գեորգի Գալուստյանի կարծիքով` կարճ ծրագրում մարզուհին ունեցավ իր լավագույն ելույթներից մեկը:

«Այս մրցաշրջանում պատանեկան օլիմպիական խաղերի կարճ ծրագրի` Անաստասիայի ելույթը լավագույններից մեկն էր: Մենք արժանի գնահատական չստացանք: Իմ կարծիքով` մենք մրցավարների աջակցությունը չունենք: Այդ իսկ պատճառով ավելի բարձր հորիզոնականների համար չենք կարողանա պայքարել: Մինչև չունենանք մրցավարների աջակցությունը, կմնանք միջին հորիզոնականներում: Ազատ ծրագրում կանենք ամեն ինչ` ավելի բարձր հորիզոնական զբաղեցնելու համար»,- ՀԱՕԿ լրատվականի հետ զրույցում ասել է գեղասահորդի հայրը, ով նաև Անաստասիայի անձնական մարզիչն է:

Պատանեկան օլիմպիական խաղերում գեղասահորդ Անաստասիա Գալուստյանը գեղասահքի կարճ ծրագրից հետո 7-րդ տեղում է: Գեղասահքի կարճ ծրագրում հանդես էր գալիս 16 գեղասահորդ: Գալուստյանը հանդես եկավ 10-րդ համարի ներքո և, հավաքելով 55,89 միավոր, զբաղեցրեց 7-րդ հորիզոնականը: