Արհեստական շնչառության սարքին միացված 11 հիվանդներից 4-ի մոտ հաստատվել է H1N1

Այսօր առողջապահության փոխնախարար Վահան Պողոսյանը անդրադարձավ սուր շնչառական հիվանդությունների հետ կապված ստեղծված իրավիճակին: Նա լրագրողներին հայտնեց, որ բժիշկներին դիմելը շատացել է վերջին օրերին, և շեշտեց, որ բոլոր բուժհաստատություններում սուր շնչառական հիվանդություններով դիմելու պարագայում օգնությունը անվճար է:

«Անցյալ տարի այս ժամանակահատվածում նույն իրավիճակն է եղել, այնպես որ` անհանգստանալու կարիք չկա: Այսօր հանրապետությունում սուր շնչառական հիվանդությունների, թոքաբորբերի, H1N1-ի համաճարակ չկա: Կա  սուր շնչառական հիվանդությունների սեզոնային հիվանդությունների աճ: H1N1-ի դեպքեր կան, որոնք արձանագրվել են, կան նաև սովորական թոքաբորբներ: Բայց հիվանդանոցները պատրաստ են հիվանդներին ընդունել: Կա նախարարի հրամանը, որ ամենաթեթև սուր շնչառական հիվանդության դեպքում ընդունվեն հիվանդանոց, հետազոտվեն ու դուրս գրվեն: Ամբուլատոր պոլիկլինիկաները ապահովված են անվճար «Տամիֆլյու» դեղով, սա կանխարգելիչ նշանակություն չունի, սա բուժական պրոցեսի համար է, այս դեղը նշանակվում է համապատասխան ցուցումներով լաբորատոր ախտորոշիչ հետազոտություններից հետո»,- ասաց փոխնախարարը:

Ինչ վերաբերում է թվային ցուցանիշներին, ապա նշվեց, որ գրանցվել է սուր շնչառական հիվանդությունների 885 դեպք` թեթևից մինչև ծանր դեպք, H1N1-ի  հաստատված դեպքերը 170 են, բայց ոչ բոլորն են, որ ծանր դեպք են համարվում,  101-ը հղի կանայք են, թույլ կամ միջին ծանրությամբ թոքաբորբ են տանում հղիներից 37-ը, վերակենդանացման բաժանմունքներում գտնվում է 77 հիվանդ, որոնցից 11-ը արհեստական շնչառության սարքին են միացված, 11-ից 4-ի մոտ հաստատվել է H1N1: 885 հիվանդից 673-ը սուր շնչառական հիվանդություններ են, 150-ը` թոքաբորբ: 

Բանախոսները հորդորում են բնակչությանը` վաղօրոք դիմել բժիշկներին: «H1N1-ի համաճարակ չկա»,- ասաց փոխնախարարը` հավելելով, որ 2015թ. վերջում գրանցվեց 3 մահվան դեպք, 2016-ի առաջին օրերին` ևս 3 դեպք, ընդհանուր` 6 մահացության դեպք`բոլորն էլ H1N1 վիրուսով:

ՀՀ ԱՆ «Հիվանդությունների վերահսկման և կանխարգելման ազգային կենտրոն» ՊՈԱԿ-ի տնօրեն Արտավազդ Վանյանը նշեց, որ իրավիճակը ոչ թե միայն Հայաստանին է բնորոշ, այլ նաև հարևան երկրներին, եվրոպական մի շարք երկրների: Հայաստանում սուր շնչառական հիվանդությունների աճը նկատվեց նախատոնական օրերին, ջերմաստիճանի նվազումն ու միջանձնային ակտիվ շփումները նախատոնական օրերին նպաստեցին հիվանդությունների աճին: Սակայն նախարարությունը դիտարկում  է համաճարակաբանական բոլոր դիտարկումները  և լիարժեք վերահսկում իրավիճակը:

«2014-ին ունեինք H1N1 վիրուսով ավելի շատ դեպքեր, քան 2015-ին»,- ասաց Արտավազդ Վանյանը: Փոխնախարարն էլ հավելեց, որ 2009-ին, 2010-ին սուր շնչառական հիվանդացության ու մահացության դեպքերն ավելի շատ են եղել: