«Դեղերի մասին» նոր օրենքի ընդունմամբ դեղարտադրողների և ներկրողների համար օրենսդրական ամուր դաշտ կստեղծվի

Երեկ երեկոյան ՀՀ առողջապահության նախարար Արմեն Մուրադյանը հեթական անգամ հանդիպել է դեղ արտադրող և ներկրող խոշոր ընկերությունների ղեկավարների հետ։ Նախարարի տեղակալ Սերգեյ Խաչատրյանը ներկայացրեց, որ Ազգային ժողովում «Դեղերի մասին» ՀՀ նոր օրենքի նախագծի քննարկման արդյունքները։ 

«Այս ձևաչափով մենք բազմաթիվ անգամներ քննարկել ենք նախագիծը` ձեր առաջարկները ևս հաշվի առնելու նպատակով։ Մինչ երկրորդ ընթերցումը կարող ենք մեր համագործակցությունն ավելի ակտիվացնել»,-ասել է փոխնախարարը` շեշտելով, որ օրենքի նախագիծը միտված է դեղերի շրջանառության կարգավորմանը` դեղի արտադրումից մինչև սպառող։ Նաև նշվեց, որ նախարարությունը մշտապես փորձում է նպաստել տեղական դեղարտադրողներին, ինչն իր արտացոլումն է գտել նոր օրենքի նախագծում։ 

Մուրադյանը շեշտել է, որ հոկտեմբերի վերջին Մոսկվայում կայացած Եվրասիական տնտեսական հանձնաժողովի Խորհրդի նախարարական նիստում ևս անդրադարձ է կատարվել դեղերի շրջանառության, գրանցման, դրանց համափոխարինելիությունը որոշող գործընթացի ներդրման և այլ հարցերին։ 

Դեղ արտադրող և ներկրող ընկերությունների ղեկավարներն առաջարկել են ավելի հաճախ հանդիպումներ կազմակերպել նախագծի դրույթների քննարկումները շարունակելու նպատակով։

«Նոր օրենքի ընդունումով մեր դեղ արտադրողների և ներկրողների համար օրենսդրական ամուր դաշտ կստեղծվի, իսկ ԵԱՀԿ-ն` գործունեության մեծ հնարավորություն կտա»,-ասել է նախարարը` պատրաստակամություն հայտնելով առաջիկայում ևս հանդիպել դեղ արտադրող և ներկրող ընկերությունների ղեկավարների հետ` ինչպես օրենքի նախագծի առանձին դրույթները, այնպես էլ` նրանց հետաքրքրող հարցերը քննարկելու նպատակով։