Եվս մեկ ներկայացում ԱԺ-ում՝ Զարուհի Փոստանջյանի մասնակցությամբ

Այսօր կառավարության հետ հարցուպատասխանի ժամանակ «Ժառանգություն» խմբակցության ղեկավար Զարուհի Փոստանջանը դարձյալ աչքի ընկավ ոչ ստանդարտ պահվածքով: Նա խոսափողին մոտեցել էր համակարգչով և ինչ-որ երգ էր միացրել, միաժամանակ հարցնում էր. «Լսվում է՞»: Նշենք, որ ոչինչ չէր լսվում:

ԱԺ նախագահ Գալուստ Սահակյանը ցածրաձայն դիմեց կողքին նստած Հերմինե Նաղդալյանին. «Հիմա սրա հետ ես ո՞նց վարվեմ»: Նա սկզբում որոշեց անջատել Փոստանջյանի խոսափողը, հետո փոշմանեց և հորդորեց դահլիճում նստածներին մի քիչ համբերել: «Համբերեք, մի քիչ հետո կանցնի»,- ասաց Գալուստ Սահակյանը:

Զարուհի Փոստանջյանը, տեսնելով, որ ձայնագրությունը չի լսվում, որոշեց ասել ինչի մասին է խոսքը: Պարզվում է` նա ցանկանում էր մի երգ լսեցնել, որում խոսվում է իշխանությունների մասին, որոնցից պետք է ազատվել:

«Ձեզ, պարո\'ն Սահակյան, հորդորում եմ զուսպ լինել, որովհետև երբ Դուք այդպես անզուսպ եք Ձեզ պահում, Ձեր ետևից ահավոր բաներ են խոսում մարդիկ»,- ասաց Զարուհի Փոստանջյանը: ԱԺ նախագահն էլ արձագանքեց. «Կարևորը` քո դիմացից են խոսում»:

Պատգամավորը խոսեց, խոսեց, նրա ժամանակը անցավ, սակայն այդպես էլ հարց չուղղեց: Գալուստ Սահակյանը որոշեց խոսքը փոխանցել հաջորդ հարց տվող պատգամավորին: Սակայն Զարուհի Փոստանջյանը համառեց` ասելով` թող կառավարությունը պատասխանի իրեն: Գալուստ Սահակյանը զարմացավ. «Ձերը երգ էր, շաբաշ տվող էլ չկար, ի՞նչ պիտի պատասխանի կառավարություն: Էլ մի փորձեք Ձեզ ընդգծել»: