Ասում են` հա, թող մի քիչ էլ արյուն թափվի, ասում եմ` բայց քո արյունն է թափվելո՞ւ, թե՞ ուրիշի. Արմեն Ռուստամյան

Արթիկում սահմանադրական հանրաքվեի քարոզարշավի ընթացքում ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը  շեշտելով, որ սահմանադրական փոփոխությունները նպաստելու են ավելի հավասարակշռված կառավարման համակարգի ստեղծմանը, ներկայացրեց նաև «ոչ»-ի սցենարը:

Այսպես` եթե սահմանադրական փոփոխությունները չեն անցնում, մնում է այս նույն համակարգը, 2017-ին ընտրվելու է մի խորհրդարան, որտեղ կա մեծամասնական համակարգ, և դրա օգնությամբ էլ իշխանությունը շատ հանգիստ ունենալու է մեծամասնություն: Ռուստամյանի խոսքով` եթե անգամ ընդդիմությունը 70 տոկոս ձայն հավաքի, միևնույն է` այս համակարգում ունենում է փոքրամասնություն: 2018-ին նախագահական ընտրություններ են, և իշխանությունը,  բնականաբար, չի զիջելու այդ պաշտոնն այլ քաղաքական ուժերին, որովհետև ունի ռեսուրսներ ու լծակներ:

«Բայց եկեք պատկերացնենք, որ ոչ թե իշխանության թեկնածուն է հաղթում նախագահական ընտրություններում, այլ ընդդիմության ներկայացուցիչը: Երկրում այդ ժամանակ կառաջանա լուրջ ճգնաժամային վիճակ` ԱԺ-ի ու նախագահի միջև, կամ էլ կսկսվի առնետավազք, և նոր նախագահը հենվելու է «առնետների» վրա: Ժողովրդին դրանից ի՞նչ: Ինչո՞ւ եք մարդկանց խաբում, թե որ չորրորդ նախագահը գա, ռեֆորմներ կանի: Ոչ, նա հենվելու է այն նույն զանգվածի վրա, որից ուզում ենք ազատվել»,- ասաց Արմեն Ռուստամյանը:

Նրա խոսքով` «ոչ»-ի մյուս տարբերակը հեղափոխությունն է, որտեղ արյուն պետք է թափվի: «Ասում են` հա, թող մի քիչ էլ արյուն թափվի, ասում եմ` բայց քո արյունն է թափվելո՞ւ, թե՞ ուրիշի: 2008-ին զոհվեց 10 մարդ, լուծվե՞ց, արդյոք, այն խնդիրը, որը նպատակ էին դրել, իհարկե, չլուծվեց: Ուրեմն ի՞նչ եղավ, այդ 10 զոհերտ եղան, կորցրեցինք 10 քաղաքացի: Հիմա նույն պրոբլեմն են ուզում առաջացնել երկրում»,- ասաց Արմեն Ռուստամյանը` գալով մեկ եզրահանգման` ՀՅԴ-ի առաջարկած ճանապարհը իսկապես անցնցում փոփոխությունների ճանապարհն է: