Բարեփոխված Սահմանադրությամբ` նախագահն ունենում է սիմվոլիկ նշանակություն. ՀՅԴ-ական

Սահմանադրական բարեփոխումների շրջանակներում ՀՅԴ ներկայացուցիչները Տավուշի մարզի Կողբ համայնքի բնակիչների հետ հանդիպման ընթացքում պատասխանեցին նրանց հուզող մի շարք հարցերի:

Կողբեցիներից մեկը հետաքրքրվեց, թե Սահմանադրությունը չի՞ սահմանում այնպիսի դրույթներ, որը կարելի է պատասխանատվության ենթարկել նախագահին, կամ չի՞ գործում, արդյոք, նրան հետ կանչելու մեխանիզմ:

ԵՊՀ աշխարհագրության և երկրաբանության ֆակուլտետի դեկան, ՀՅԴ-ական Մարատ Գրիգորյանը բացատրեց, որ բարեփոխված Սահմանադրությամբ` նախագահն ունենում է պարզապես սիմվոլիկ նշանակություն, արբիտրի դեր է ստանձնում:

ՀՅԴ մեկ այլ ներկայացուցիչ` տնտեսագետ Սուրեն Պարսյանն էլ նշեց, որ նախագահի պաշտոնանկության հարցի կարգավորման երեք դեպք է նախատեսում: «Դավաճանություն, այլ ծանր հանցագործություններ կամ Սահմանադրության կոպիտ խախտում: Այս երեք դեպքերի առկայության դեպքում է հնարավոր ԱԺ-ում նախաձեռնել նախագահի պաշտոնանկությունը: Պատգամավորները պետք է դիմեն Սահմանադրական դատարան` եզրակացություն ստանալու համար: Եզրակացությունը ստանալուց հետո պետք է   պատգամավորների ձայների երկու երրորդով ընդունեն հանրապետության նախագահի պաշտոնանկությունը, այսինքն` հետ կանչման մեխանիզմ կա, նաև` հետկանչման մեխանիզմ է գործում պատգամավորների դեպքում»,- ասաց ՀՅԴ-ականը: