Բարեփոխված Սահմանադրությամբ՝ վերանում են միասեռ ամուսնություններին վերաբերող խոսակցությունները

Սահմանադրական փոփոխությունների քարոզարշավի շրջանակներում ՀՅԴ ներկայացուցիչները  հանդիպում ունեցան Տավուշի մարզի Կողբ գյուղի բնակիչների հետ:  ՀՅԴ-ական, տնտեսագետ Սուրեն Պարսյանն իր ելույթում նշեց, որ իրենք  առաջարկում  են երկրի վիճակը  փոխելու խաղաղ ճանապարհ, որը զերծ է արյունահեղությունից:  

«Մեր երկրում իսկապես փոփոխությունների կարիք կա: Եթե փոփոխություն, ապա պետք է լինի համակարգային: Միայն անձերի փոփոխությամբ որևէ լուրջ ու արմատական փոփոխություն չի կարող լինել, իսկ ցանկացած անձի փոփոխություն, այս վիճակի մեջ որևէ բեկում չի մտցնելու»,- ասաց Պարսյանը՝ հավելելով. «Սահմանադրության փոփոխության միջոցով փորձում ենք մեր երկրում դրական տեղաշարժ անել: «Ոչ»-ի քարոզիչներն էլ թող փորձեն փողոցային անհնազանդության միջոցով հասնել իշխանափոխության: Նրանք մարդափոխությամբ են զբաղվում, ոչ թե իշխանափոխությամբ: Իրենք ուզում են Սերժ Սարգսյանին փոխարինել  իրենց Սերժ Սարգսյանով: Իրենք նոր, արդյունավետ համակարգ ստեղծելու հարց իրենց առջև չեն դրել: Իրենք ասում են՝ եկեք մեր մարդուն դնենք, մեր մարդը լավ կաշխատի: Մեր երեք նախագահների կառավարման տարիների փորձը ցույց տվեց, որ մենք ինչքան նախագահ ենք փոխել, համակարգը ինչպես վատ աշխատել է, այնպես էլ շարունակում է աշխատել»:

 ՀՅԴ ներկայացուցիչը Կողբի բնակիչների ուշադրությունը հրավիրեց  բարեփոխված Սահմանադրության նախագծում զետեղված 15-րդ հոդվածի վրա, որը սահմանում է հայկական մշակույթին, կրթությանը, գիտությանը վերաբերող հարցեր: «Այս Սահմանադրության 15-րդ հոդվածով  սահմանվում է, որ պետությունը խթանում է կրթության, մշակույթի, գիտության զարգացումը, ինչպես նաև այն, որ հայոց լեզվի տարածումը, մեր պատմական ժառանգության պահպանումը պետության հովանավորության և պաշտպանության ներքո է գտնվում: Շատ կարևոր է, որ նոր Սահմանադրության մեջ սահմանվում է  հայոց լեզվի և պատմական ժառանգության պահպանումը բարձր հոգածության ներքո վերցնելը` նաև Հայաստանի սահմաններից դուրս»,- ընդգծեց Պարսյանը:

Նա անդրադարձավ նաև բարեփոխված Սահմանադրության այն դրույթին, որը վերաբերում է հայկական ընտանիքների ամրապնդման երաշխիքներին: «35-րդ հոդվածը սահմանում է, որ ամուսնական տարիքին հասած կինը և տղամարդը  միմյանց հետ ամուսնանալու և երեխաներ ունենալու  իրավունք ունեն: Այս կետի միջոցով վերանում են բոլոր այն խոսակցությունները, որոնք վերաբերում են միասեռ ամուսնություններին: Սահմանադրևական երաշխիքներ են դրվում հայկական ընտանիքի ամրապնդման, հայկական ընտանիքի պահպանման համար: Սա իրականում շատ կարևոր խնդիր է՝ գլոբալացման այս դարաշրջանում»,- ընդգծեց ՀՅԴ ներկայացուցիչը: