Գործուղումների քանակի ավելացման արդյունքում պետական պահպանության ծառայությանը տրվելու է 20 միլիոն դրամ

Կառավարության վաղվա օրակարգում ներառված է որոշման նախագիծ, ըստ որի` ՀՀ  պետական  պահպանության ծառայության զինծառայողների 2015 թվականի արտասահմանյան գործուղումների քանակի ավելացմամբ պայմանավորված` ՀՀ պետական  պահպանության ծառայությանը պետք է հատկացնել  20 միլիոն դրամ` ՀՀ 2015 թվականի պետական բյուջեով նախատեսված կառավարության պահուստային ֆոնդի հաշվին:

Որոշումը  պայմանավորված է ՀՀ բարձրաստիճան պաշտոնատար անձանց արտասահմանյան գործուղումների քանակի ավելացմամբ: Արտասահմանյան գործուղումների ընթացքում ՀՀ բարձրաստիճան պաշտոնատար անձանց ուղեկցող պետական պահպանության ծառայության զինծառայողների գործուղման ծախսերը վճարվում են ՀՀ կառավարության հրամանագրերի համաձայն:

2015 թ. պետական բյուջեով պետական պահպանության ծառայությանը հատկացվել է 75 միլիոն դրամ:  Ներքին հոդվածային վերաբաշխմամբ`  այս  հոդված  է  տեղափոխվել  ևս  7 միլիոն  դրամ: Արդյունքում` 82 միլիոն  դրամից մնացել է 2 միլիոն  899 հազար դրամ, որն ավիատոմսերի ձեռք բերման գումարն է:

2015 թվականի պետական բյուջեով նախատեսված` կառավարության պահուստային ֆոնդից ՀՀ պետական պահպանության ծառայությանը հատկացվել է 20 միլիոն  դրամ, որն ամբողջությամբ ծախսվել է: