ԴԱՀԿ-ին չեն բավականացնում 34 ծառայողական մեքենաները, դրանց թիվը կհասցվի 56-ի

Այսօր կառավարության նիստում արդարադատության նախարար Արփինե Հովհաննիսյանը կառավարության հաստատմանը ներկայացրեց «ՀՀ պետական մարմիններին ծառայողական մեքենաների հատկացման, շահագործման և սպասարկման մասին» որոշման մեջ փոփոխություններ կատարելու մասին որոշման նախագիծ:

Ըստ նախարարի` արդարադատության նախարարության դատական ակտերի հարկադիր ակտերի ծառայությունը 34 ծառայողական մեքենաների թիվն առաջարկվում է դարձնել 54:

«Իրականում հասկանալով այն հարցադրումները, որոնք կարող են առաջանալ, քննարկման առարկա դառնալ, ես ուզում եմ ընդգծել, որ ամենայն ուշադրությամբ և բծախնդիր կերպով  ուսումնասիրվել է ավտոմեքենաների ձեռք բերման անհրաժեշտությունը: Ուզում եմ հատուկ ընդգծել` ոչ թե անձի համար է հատկացվում, այլ ծառայությանը` աշխատանքի արդյունավետության բարձրացման համար»,- ասաց նա` հավելելով, որ կատարողական վարույթների թիվը 6 անգամ ավելացել է, քաղաքացիների շահերի պաշտպանության հետ կապված գործերի ձգձգման խնդիր է առաջանում ծառայողական մեքենաների սակավության պատճառով:

Նախարարը շեշտեց նաև, թե այդ ծառայողական մեքենաները ոչ թե բյուջեի հաշվին են ձեռք բերվելու, այլ արտաբյուջետային միջոցների:

Կառավարությունը հաստատեց նախագիծը: