Դեղերի 34 տոկոսի գները նվազել են մինչև 30 տոկոս

Հայաստանի Հանրապետությունում գրանցված է շուրջ 4500 անվանում դեղ,  որոնցից ՀՀ առողջապահության նախարարության կողմից մշտադիտարկվել են թվով 50` առավել լայն սպառում ունեցող դեղերի մանրածախ գները:  Այս մասին ՀՀ կառավարության նիստից հետո լրագրողների հետ զրույցում պարզաբանեց ՀՀ առողջապահության նախարար Արմեն Մուրադյանը:

Նա նշեց, որ բանակցությունների և մայիս- նոյեմբեր ամիսներին դինամիկ մոնիտորինգային աշխատանքների արդյունքում հայտնաբերվել է`  դեղերի 60 տոկոսի գները մնացել են անփոփոխ, 34 տոկոսի գները նվազել են մինչև 30 տոկոս, 6 տոկոսի գները բարձրացել են մինչև 3 տոկոս:

Նախարարի տեղեկացմամբ` նոյեմբերին ևս իրականացվել է  նույն 50 անվանում դեղերի գների մշտադիտարկում: Վերլուծության արդյունքում պարզվել է, որ, հոկտեմբերի համեմատությամբ, աղյուսակում ներառված դեղերի մանրածախ գները դեկտեմբերի առաջին շաբաթվա դրությամբ մնացել են անփոփոխ, բացառությամբ 6 անվանման, որոնց մանրածախ գները կրկին նվազել են:

Հաշվի առելով, որ դեղն առաջին հերթին սոցիալական նշանակության ապրանք է, ՀՀ առողջապահության նախարար Արմեն Մուրադյանը դեղարտադրող և ներմուծող կազմակերպությունների հետ շարունակական հանդիպումների ժամանակ հորդորում  է վարել դեղերի գները զսպող քաղաքականություն, որպեսզի քաղաքացիները ապահովվեն որակյալ, անվտանգ, արդյունավետ և մատչելի դեղերով: