Ինչպես ընտանիքում, այնպես էլ ԱԺ-ում կանայք մտահոգված են կուտակվող պարտքով

ԱԺ արտահերթ նիստում քննարկվում է կառավարության ներկայացրած վարկային համաձայնագիրը, որը նախատեսում է մաքսային մարմինների համար անհրաժեշտ սարքավորումների ձեռք բերում՝ մաքսային մարմինների աշխատանքի բարելավման ու անհրաժեշտ վերահսկողության նպատակով:

ԲՀԿ խմբակցության ղեկավար Նաիրա Զոհրաբյանը հիմնական զեկուցող՝ ՀՀ ֆինանսների փոխնախարար Վախթանգ Միրումյանին հարց ուղղեց՝ նախ ասելով, որ  բոլոր վարկերն էլ վերցվում են բարի նպատակներով, բայց արդյունքում ավելացում է մեր երկրի պետական պարտքը, որն արդեն հատում է 5 միլիարդի շեմը: Պատգամավորը հարցրեց, թե արդյո՞ք վտանգավոր չի դառնում նոր վարկեր վերցնելը:

Վախթանգ Միրումյանը պատասխանեց, որ, պետական պարտքի կառավարման տեսանկյունից, ներկայումս կառավարության գործողություններն ավելի սահմանափակ են, բայց կարևոր է, թե հիշյալ վարկային ծրագրով ինչ է ակնկալվում՝ 10 անգամ կկրճատվեն այլընտրանքային ծախսերը, ինչն էլ, իր հերթին, բարենպաստ կազդի տնտեսության վրա:

ԱԺ նախագահի տեղակալ Հերմինե Նաղդալյանն էլ հավելեց, թե ՀՀ  կառավարությունը երբեք հակապետական նպատակներով վարկ չի վերցնում: Իսկ ՕԵԿ-ական Հեղինե Բիշարյանը նշեց, որ ինչպես ընտանիքում է կինը մտահոգվում, երբ ընտանիքի պարտքերը շատանում են, այնպես էլ խորհրդարանում են իրենք մտահոգ այդ հարցով: