10 ամսական Դարինայի առաջին թռիչքը, Պսկովի փոխքաղաքապետի ամուսնական ճամփորդությունը. մանրամասներ կործանված ինքնաթիռի ուղեւորների մասին

Ռուսական A321 ինքնաթիռի վթարի հետեւանքով 217 ուղեւոր եւ անձնակազմի 7 անդամ է զոհվել:  Զոհերի թվում 25 երեխա կա:

Ռիա Նովոստի-ն նոր տեղեկություններ է  ներկայացնում վթարի զոհերի մասին: Ինքնաթիռի ամենափոքրիկ ուղեւորը 10 ամսական Դարինան է եղել: Գրոմովների ընտանիքը` փոքրիկ Դարինան, նրա հայրն ու մայրը` Ալեքսեյն ու Տանյան հոկտեմբերի 15-ին են մեկնել Եգիպտոս, որտեղ նշել են աղջկա 10-ամսյակը եւ իրենց ամուսնության միամյակը: Տանյան հրապարակել էր փորքիկի լուսանկարը` օդանավակայանում, թաթիկներով հենված պատուհանին ու գրել` «Ինքնաթիռի գլխավոր ուղեւորը»:  

Մյուս փոքրիկ ուղեւորը 3-ամյա Նաստյան է, ով ծնողների հետ Եգիպտոսում նշել է նրանց ամուսնության 4-ամյակն ու ծանոթության 10-ամյակը: Թռիչքից առաջ Նաստյայի մայրը ամուսնու եւ դստեր նկարն է սոցցանցում տեղադրել եւ գրել` «Մենք տուն ենք թռչում»:

 Ինքնաթիռի զոհված ուղեւորներից է Պսկովի փոխքաղաքապետը, ով այրիանալուց հետո նոր էր ամուսնացել եւ կնոջը նվեր էր արել` շրջագայություն Եգիպտոս: