300 դոլարի համար ԵՊՀ աշխատակցի են դատում

Կենտրոն և Նորք-Մարաշ վարչական շրջանների ընդհանուր իրավասության դատարանում մեկնարկեց ՀՀ ԱԱԾ-ի կողմից բացահայտված խարդախության փորձի վերաբերյալ գործը:

Ամբաստանյալի աթոռին է Երևանի պետական համալսարանի ուսումնամեթոդական վարչության ուսումնական գործընթացի վերահսկման բաժնի ավագ դիսպետչեր Արթուր Աճեմյանը:

 Համաձայն մեղադրական եզրակացության ՝ Ա. Աճեմյանը  ուրիշի գույքը հափշտակելու դիտավորությամբ նշված ԲՈՒՀ-ի ուսանող Կարեն Սարգսյանին ներկայացրել է, որ պայմանավորվածություն ձեռք կբերի, այսինքն` իր պաշտոնեական դիրքն օգտագործելով, կնպաստի, որ քննություն ընդունող դասախոսները Կարեն Սարգսյանի քննությունները դրական կգնահատեն, նրանից ստացել է 300 ԱՄՆ դոլարին համարժեք ՀՀ դրամ, սակայն չի հասցրել հափշտակել գումարը, քանի որ բռնվել է ՀՀ ԱԱԾ աշխատակիցների կողմից:

Ա. Աճեմյանին մեղադրանք է առաջադրվել ՀՀ ՔՕ 34-178-րդ հոդվածի  2-րդ մասի 5–րդ կետի հատկանիշներով, նրա նկատմամբ, որպես խափանման միջոց, ընտրվել է կալանավորումը:

Նշենք, որ ամբաստանյալը նախաքննության ընթացքում չի ընդունել առաջադրված մեղադրանքը, սակայն այսօր դատարանում նա հայտնեց,  որ ընդունում է մեղքը ու միջնորդեց արագացված դատական կարգ կիրառել: Նախաքննության ընթացքում մեղադրող դատախազը դեմ էր եղել, որպեսզի արագացված դատաքննություն կիրառվի, սակայն դատարանում հայտնեց, որ դեմ չէ: Դեմ չէր նաև տուժողը: Լսելով կողմերի կարծիքները` նիստը նախագահող դատավոր Գագիկ Պողոսյանը  բավարարեց  ամբաստանյալի և նրա պաշտպանի միջնորդություններն ու արագացված դատական կարգ կիրառեց:

Նման կարգի դեպքում չեն լսում վկաներին, հաշվի են առնվում ամբաստանյալի անձը բնութագրող հանգամանքները և այլն: Բացի այդ` ամբաստանյալը կարող է բողոքարկել վճիռը միայն պատժի մասով: