ՖԱՖ-ը պահանջներ է առաջադրել ՀՖՖ-ին

Այսօր տեղի ունեցավ Ֆուտբոլի Հայաստանի ազգային հավաքականի երկրպագուների  «Առաջին հայկական ճակատ» (ՖԱՖ) ֆան-շարժման հիմնադիր անդամ Սերգեյ Ջանջոյանի և անդամ Արսեն Զաքարյանի մամուլի ասուլիսը: Հաշվի առնելով վերջին շրջանում Հայաստանի տարբեր տարիքային հավաքականների,  մասնավորապես` ազգային հավաքականի  անփառունակ ելույթները` նրանք իրենց պահանջներն առաջադրեցին Հայաստանի ֆուտբոլի ֆեդերացիային:

«Բոլորս տեսնում ենք, որ մեր ցույց տված արդյունքները գնալով վատանում են, և հասնում ենք մի կետի, որից ավելի վատ պատերացնել հնարավոր չէ: Այդ պատճառով ՖԱՖ-ի անդամներն ունեն պահանջներ` ՀՖՖ-ին:  Վերջին 6 տարվա ընթացքում աջակցել ենք մեր հավաքականին բոլոր տնային և հնարավոր արտագնա խաղերում: Կազմակերպել ենք միասնական երթեր, ֆան-զոն-ներ, աջակցել ենք այն ֆուտբոլիստներին, ովքեր հրավիրվել են հավաքական, սակայն հասունացել է մի իրավիճակ, որտեղ մենք պետք է այլ գործողությունների դիմենք:  Քանի որ բոլորս տեսնում ենք, որ մեռնում է հայկական ֆուտբոլը, իսկ հայկական ֆուտբոլի մահով մեռնում է նաև ՖԱՖ-ը: Մենք չենք կարող թույլ տալ, որ երկրպագուն բոյկոտի հավաքականի հանդիպումը: Այդ պատճառով մենք ունենք պահանջներ` ՀՖՖ-ին:

Հայաստան-Ալբանիա խաղում մենք հանդես եկանք ակցիայով և  պահանջեցինք մարզիչ՝ բառի ամբողջ իմաստով: Մեր առաջին պահանջն է, որ հավաքական հրավիրվի արտերկրի պրոֆեսիոնալ մասնագետ: Մարզիչ, ով ինքնուրույն է որոշում կայացնելու: Մեր պահանջն է, որ հավաքականը փորձարկումների դաշտ չլինի, և մեր մարզիչը լինի արտասահմանցի մեծ ճանապարհ անցած,  անունով մարզիչ, ոչ թե անունը լսելիս մենք համացանցում ման գանք, թե ով է նոր մարզիչը:

Երկրորդ պահանջը հրավիրվող  ֆուտբոլիստների մասին է: Մենք ֆուտբոլային գերտերություն չենք և չունենք շատ բարձրակարգ ֆուտբոլիստներ, որպեսզի մեզ թույլ տանք ոչ ֆուտբոլային պատճառնրով հրաժարվել մեր ֆուտբոլիստներից: Մեր պահանջն է, որ ՀՖՖ-ն մի կողմ դնի բոլոր ամբիցիաները և թույլ տա մյուս ֆուտբոլիստներին օգնել մեր հավաքականն: Կարող եմ թվարկել մեր ֆուտբոլիստներին` Արտակ Դաշյան, Դենիս Թումասյան,  Արթուր Եդիգարյան:

Մեր 3-րդ պահանջն է տոմսերի գների նվազեցումը: Համեմատելով մեր սոցիալական  վիճակը և եվրոպական երկրներում տոմսերի գները` կարող ենք ասել, որ մեզ մոտ գները շատ բարձր են: ՖԱՖ-ն այս մրցաշրջանում ՀՖՖ-ից  ստացել է միջինը 500-800 զեղչով տոմս:  Այսուհետ մենք հրաժարվում ենք զեղչով տոսմերից և այսուհետ այցելելու ենք  մարզադաշտ այնպես,  ինչպես բոլոր երկրպագուները:  Մեր պահանջն է տոմսերի գների վերանայումը»,- ասաց ՖԱՖ հիմնադիր անդամ Սերգեյ Ջանջոյանը:

- Արդյո՞ք այս  պահանջների մեջ չի մտնում  ՀՖՖ  նախագահի հրաժարականը:

-Մեր առաջին պահանջը մարզիչն է,  իսկ երկրորդ գործողությունը մեր պահանջն է ՀՖՖ-ին:  Երրորդ քայլը մեր պահանջներին տեր կանգնելն է,  իսկ թե ի՞նչ կլինի  մեր պահանջները չբավարարելու դեպքում,  դեռևս չենք ցանկանում փակագծերը բացել: