«Թուրքիան դարձել է չկառավարվող երկիր». ընդդիմությունը չեղարկել է հանրահավաքները

Թուրքիայի մայրաքաղաք Անկարայում տեղի ունեցած պայթյուններից հետո Ժողովրդա-հանրապետական կուսակցության անդամները որոշել են չեղարկել արտահերթ խորհրդարանական ընտրությունների շրջանակներում կայանալիք իրենց բոլոր հանրահավաքները:

Ըստ Demokrathaber-ի՝ Hurriyet-ի հետ զրույցում կուսակցության առաջնորդի խորհրդական Էրդողան Թոփրաքը հայտնել է, որ իրենք փոխել են իրենց հայեցակարգը և այսուհետ հանրահավաքների փոխարեն կայցելեն մարդկանց ու կլսեն նրանց մտահոգությունները:

«Այս ցավոտ օրերին հանրահավաքների ժամանակ ի՞նչի մասին պետք է խոսենք: Բացի այդ` անվտանգության խնդիր կա: Կառավարությունը չի ապահովում հասարակության անվտանգությունը: Թուրքիան ղեկավարվում է շատ վատ, ավելի ճիշտ՝ դարձել է չկառավարվող երկիր»,- ասել է Թոփրաքը:

Հիշեցնենք, որ նման որոշում էր ընդունել նաև քրդամետ Ժողովուրդների դեմոկրատական կուսակցությունը:

Թուրքիայում արտահերթ խորհրդարանական ընտրությունները կկայանան նոյեմբերի 1-ին: