Ինչ պետք է անեն չաշխատող մայրերը, որպեսզի նպաստ ստանան

Տեղեկացրել էինք, որ երեկ կառավարության նիստի ժամանակ որոշվել էր, որ 2016 թվականի հունվարի 1-ից չաշխատող կանանց նույնպես մայրության նպաստ կնշանակվի:

Այսօր աշխատանքի և սոցիալական հարցերի նախարարության կենսաթոշակային ապահովության վարչության պետ Անահիտ Գալստյանը լրագրողներին հայտնեց, որ չաշխատող մայրիկին նույնպես այսուհետ ժամանակավոր անաշխատունակության թերթիկ կտրվի /140 օրով/, ինչի հիման վրա էլ հետագայում նա նպաստ կստանա:

Նպաստ ստանալու համար անհրաժեշտ է նաև ծննդօգնության պետական հավաստագիր ունենալ, ինչն, ըստ Գալստյանի, կնպաստի, որպեսզի կինը հղիության վաղ ժամկետում նախազննության գնա:

«Ուզում եմ հիշեցնել, որ մայրության նպաստը ստանում են միանվագ: Մայրության նպաստը կհաշվարկվի դիմում գրելու պահին կառավարության սահմանած նվազագույն ամսական աշխատավարձի 50 տոկոսի չափով: Մայրության նպաստը չաշխատող մայրիկների դեպքում 2016-ի հունվարի 1-ի դրությամբ /հաշվի առնելով միջին աշխատավարձը/ կլինի 126 600 դրամ: Մեր տվյալներով` 2016-ին 300 000 չաշխատող մայրիկ կստանա մայրության նպաստ, որը կկազմի շուրջ 4 մլրդ դրամ: Ի դեպ, այս գումարն արդեն իսկ նախատեսված է 2016-ի պետական բյուջեում»,- ասաց Գալստյանը:

Չաշխատող մայրը նպաստ ստանալու համար պետք է`

- հղության 30 շաբաթականից հետո բժշկից վերցնի իր` անաշխատունակության թերթիկը,

- հաշվառված լինի պետական ռեգիստրում` ՀՀ բնակության վայրի հասցեով,

- ներկայացնի դիմում իր բնակության վայրի կենսաթոշակ նշանակող տարածքային բաժին,

- ունենա անձը հաստատող փաստաթուղթ և սոցիալական քարտ /բացակայության դեպքում` դրանից հրաժարվելու փաստաթուղթը/,

- ունենա ծննդօգնության պետական հավաստագիր:

Ի դեպ, ծննդօգնության պետական հավաստագիր չունենալու դեպքում նպաստ չի տրվի: Նպաստ չի տրվի նաև, եթե կինը չդիմի 140 օրում:

Գալստյանը տեղեկացրեց, որ նպաստ ստանալու համար հղիի փոխարեն համապատասխան փաստաթղթերը կարող է ներկայացնել նրա ընտանիքի անդամներից մեկը, անգամ` հարևաններից մեկը:

Ի դեպ, եթե հղիությունն ընդհատվի մինչև 22 շաբաթական ժամկետում, կինը նպաստ չի ստանա, իսկ 22-ից հետո` կարող է ստանալ: Փաստաթղթերը ներկայացնելուց հետո 1 ամսվա ընթացքում որոշում է կայացվում, և նպաստը վճարվում է: