Նախարարն ու պատգամավորները միմյանց մեղադրում են պոպուլիզմի մեջ

Այսօր խորհրդարանի հերթական նիստի ընթացքում մտքերի փոխանակության փուլում ելույթ ունեցավ ԲՀԿ ղեկավար Նաիրա Զոհրաբյանը: Նա նշեց, որ, մինչ բուն նյութին անցնելը, ցանկանում է անդրադառնալ երեկվա` կառավարության հարցուպատասխանի ժամանակ տեղի ունեցած դեպքին:

Հիշեցնենք, որ երեկ` կառավարության հետ հարցուպատասխանի ժամանակ, ԲՀԿ մամուլի խոսնակ Վահան Բաբայանը խաղողի մթերման վերաբերյալ հարց էր ուղղել գյուղատնտեսության նախարար Սերգո Կարապետյանին, իսկ նախարարն այդ հարցը որակել էր «պոպուլիզմ»:

«Ես ուզում եմ անդրադառնալ մեր պատգամավորի` կառավարության ներկայացուցչին ուղղված շատ լուրջ հարցադրմանը: Խոսքը խաղողի մթերման մասին է: Սա լուրջ խնդիր է գյուղացիների համար: Եթե գյուղատնտեսության նախարարի համար սա առնվազն պոպուլիզմ է, ապա, ինչպես ասում են, մեկնաբանությունները թողնում եմ ձեզ»,- ասաց պատգամավորըը և հավելեց. «Գյուղացիներն այսօր չեն կարողանում իրացնել իրենց մթերքը: Պատգամավորի լրջագույն մտահոգությունը, որը վերաբերում էր բերքի իրացման խնդրին, որակել որպես պոպուլիզմ, ես հենց սա եմ առնվազն պոպուլիզմ համարում»: