«Սառը ցնցուղ՝ Էրդողանից՝ ԵՄ-ին». թուրքական կայքի լպիրշ մեկնաբանությունը

Թուրքիայի նախագահ Ռեջեփ Թայիթ Էրդողանը դեռևս հավանություն չի տվել Եվրահանձնաժողովի՝ սիրիացի փախստականներին օգնելու համար Թուրքիային 1 միլիարդ եվրո օգնություն տրամադրելու ծրագրին:

Haberiyakala-ն տեղեկացնում է, որ պաշտոնական այցով Բելգիայում գտնվող Էրդողանը հանդիպումներ է ունեցել Եվրախորհրդարանի նախագահ Մարտին Շուլցի, Եվրախորհրդի նախագահ Դոնալդ Տուսկի, Եվրահանձնաժողովի նախագահ Ժան Կլոդ Յունկերի հետ և քննարկել սիրիացի փախստականների խնդիրը:

Հանդիպման ընթացքում Յունկերն Էրդողանին է ներկայացրել իրենց մշակած` աջակցության ծրագիրը, սակայն այդ կապակցությամբ Թուրքիայի ԱԳ նախարարությունը հայտարարել է, որ նախատեսվում է ստեղծել համատեղ մասնագիտական խումբ՝ առաջարկն ուսումնասիրելու և գնահատելու համար:

Բացի այդ` Էրդողանը պնդել է, թե Թուրքիան վերջին 4 տարվա ընթացքում սիրիացի փախստականներին օգնելու համար ավելի քան  6 մլրդ դոլար է ծախսել:

Ի դեպ, թուրքական կայքը Էրդողանի՝ դեռևս առաջարկը չընդունելու որոշումը մեկնաբանել է որպես «սառը ցնցուղ՝ ԵՄ-ին»: