Զգուշավոր քաղաքականությունը ճիշտ է, բայց այն լկտիացնում է Ադրբեջանին. Սոս Գիմիշյան

«Քրիստոնեա-ժողովրդական վերածնունդ» կուսակցության նախագահ Սոս Գիմիշյանը, այսօր լրագրողների հետ խոսելով սահմանային լարվածության մասին, նշեց, որ այդ թեմայով ընդդիմադիր դաշտը չունի տեղեկատվություն, և որ այդ տեղեկատվությանը տիրապետում է իշխանությունը, ուստի հենց իշխանությունը կարող է հստակ պատասխանել սահմանային լարվածության վերաբերյալ հարցերին:

Ըստ նրա` իշխանությունը զգուշավոր քաղաքականություն է վարում` այդ թեմայի հետ կապված, ինչը ճիշտ մոտեցում է, որովհետև չի կարելի կոնֆլիկտը հասցնել մեծ բախման: Բայց, մյուս կողմից, Սոս Գիմիշյանի մտահոգությունն այն է, որ այդ զգուշավորությունից օգտվում է Ադրբեջանը, որի գործողությունները դառնում են ավելի լկտի:

«Զգուշավոր քաղաքականությունը ճիշտ է, բայց Ադրբեջանն ինքնագլուխ չի անում իր գործողությունները, այլ երկրներ նույնպես կարող են խառնված լինել այդ բախումները հրահրելու մեջ: Եթե շատ զգուշավոր ես լինում, այնտեղ լկտիանում են: Պետք է գտնել ճիշտ բալանսը: Հուսով եմ ու համոզմունք ունեմ, որ լայնամասշտաբ պատերազմ չի սկսվի»,- ասաց Սոս Գիմիշյանը: