Այս ամռանը ՃՏՊ-ների արդյունքում 6 երեխա է մահացել

Այս տարվա վերջին եռամսյակում տեղի է ունեցել երեխաների մասնակցությամբ 123 ճանապարհատրանսպորտային պատահար, արդյունքում` զոհվել է 6 երեխա, վիրավորվել՝ 136-ը։ Այս վիճակագրությունն այսօր լրագրողներին ներկայացրեց ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը՝ նշելով, որ այդ ցուցանիշը, նախորդ տարվա նույն ժամանակահատվածի համեմատ, նվազել է:

Սարգսյանի խոսքով՝ երեխաների մասնակցությամբ ՃՏՊ-ների աճ է գրանցվում հատկապես արձակուրդի շրջանում՝ հուլիս-օգոստոս ամիսներին: Պատահարների մեծամասնությունը հետիոտներին վրաերթի ենթարկելու դեպքերն են, և քանի որ երեխաները հաճախ են անթույլատրելի տեղերից հատում փողոցը կամ հեծանիվներով փողոց դուրս գալիս, նման դեպքեր են գրանցվում:

Անդրադառնալով ուսումնական տարվա մեկնարկին ոստիկանության կողմից իրականացվելիք ծառայությանը` Սարգսյանը նշեց, որ ոստիկանությունը մեկամսյա ծառայություն կիրականացնի բոլոր այն դպրոցների մոտ, որոնք գտնվում են ինտենսիվ երթևեկություն ունեցող փողոցների կողքին։ Սակայն նա նշեց, որ ոստիկանությունը միայն մեկամսյակով չի բավարարվելու և շարունակելու է ծառայությունը ինտենսիվ երթևեկություն ունեցող փողոցների կողքին գտնվող դպրոցների տարածքում։