Թուրք ազգայնականները կրկնել են կոալիցիա կազմելու իրենց պայմանները

Թուրքիայում «Ազգայնական շարժում» կուսակցության փոխնախագահ Մևլութ Քարաքայան կոալիցիա ստեղծելու մասին հայտարարությամբ է հանդես եկել, կրկնելով, որ «Արդարություն և զարգացում» կուսակցության հետ բանակցությունները անիմաստ կլինեն, եթե վերջինս չընդունի իրենց կողմից ներկայացված պայմանները:

Ըստ Sozcu-ի՝ Քարաքայայի խոսքով՝ իրենց պայմաններն ընդունելու դեպքում կոալիցիան կձևավորվի 3-5 օրվա ընթացքում։

Թուրք ազգայնամոլների ներկայացրած պայմաններից մեկը քրդերի հետ հաշտեցման  գործընթացի դադարեցումն է: Նրանք պահանջում են նաև կաշառակերության դեպքերը քննել և սահմանափակել նախագահ Ռեջեփ Թայիփ Էրդողանի սահմանադրական իրավունքները։

Նշենք, որ Թուրքիայում կառավարության ձևավորման համար նախատեսված վերջնաժամկետը կավարտվի օգոստոսի 23-ին։