Թուրքիայի ազգայնականները մերժել են կոալիցիա կազմելու` Դավութօղլուի առաջարկը

Թուրքիայի վարչապետ Ահմեդ Դավութօղլուն հայտարարել է, որ Թուրքիայի  «Ազգայնական շարժում» կուսակցությունը  նոր կառավարության հետ կոլաիցիա չի կազմի, տեղեկացնում է Associated Press-ը:

 Խորհրդարանական ընտրություններում հաղթած «Արդարություն եւ զարգացում» կուսակցության ղեկավար Դավութօղլուն այդ մասին հայտարարել է ազգայնականների ղեկավար Դեւլեթ Բախչելիի հետ հանդիպումից հետո:  Հանդիպման արդյունքում պարզ է դարձել, որ ուլտրաաջ ազգայնականները նախընտրում են մնալ ընդդիմություն:

Բախչելիի հետ հանդիպումը կոալիցիոն կառավարություն կազմելու բանակցությունների առաջին փուլն է: Մինչ այդ Դավութօղլուն հանդիպել էր նաեւ Ժողովրդա-հանրապետական կուսակցության առաջնորդ Քեմալ Քիլիչդարօղլուի հետ:

Հիշեցնենք, որ խորհրդարանական ընտրությունների արդյունքում իշխող «Արդարություն եւ զարգացում»-ը 2002 թվականից ի վեր առաջին անգամ զրկվեց խորհրդարանական մեծամասնությունից, որից հետո երկրի նախագահ Ռեջեփ Թայիփ Էրդողանը վարչապետին հանձնարարեց ձեւավորել կոալիցիոն կառավարություն: Ինքը` Դավութօղլուն նոր կառավարություն ձեւավորելուց հետո հրաժարական կտա: