12 տարի առաջ Երևանում շատ տխուր էր. Հարություն Խաչատրյան

12 տարի առաջ Երևանում շատ տխուր էր, որովհետև կինո չկար, չէին ցուցադրվում աշխարհի լավագույն ֆիլմերը, և դրանք անուշադրության էին մատնվում: Այս մասին Yerkir.am-ի հետ զրույցում ասաց «Ոսկե ծիրան»  կինոփառատոնի հիմնադիր տնօրեն Հարություն Խաչատրյանը: Այդ ժամանակ, ըստ նրաի, դիտվում էին բավական վատ սերիալներ, ֆիլմեր, որոնք բերում էին Հայաստան` կոմերցիոն նպատակներով:

«Հայաստանում կինո գրեթե չէին նկարում, շատ քիչ ֆիլմեր էին նկարում, իսկ փառատոնի 12 տարիների ընթացքում մենք հասանք նրան, որ Հայաստանում կինոյի ոլորտը սկսեց «բզզալ»: Այս տարի 30 հայկական ֆիլմեր կան «Ոսկե ծիրան» կինոփառատոնում, և կան երիտասարդներ, որոնք նկարում են իրենց 2-3-րդ ֆիլմերը, բայց միջազգային անվանի փառատոներին մրցանակներ են ստանում»,-ասաց Խաչատրյանը:

Ըստ նրա` ուրախալի է այն փաստը, որ տարեցտարի ավելանում է նաև Հայաստան այցելող ռեժիսորների, դերասանների թիվը, ինչը նպաստում է կինոլորտի զարգացմանը: