Հացադուլի մասին իմ կարծիքը կարեւոր չէ. Վաղինակ Շուշանյան

«Ոչ թալանին» նախաձեռնության անդամ Վաղինակ  Շուշանյանն այսօր մասնակցելու է Ազատության հրապարակում նոր նախաձեռնող խմբի հրավիրած հավաքին:

«Ես մասնակցելու եմ` որպես շարքային քաղաքացի: Ավելին` ես արդեն այստեղ եմ` Ազատության հրապարակում»,- Yerkir.am-ի հետ զրույցում ասաց նա:

Հիշեցնենք, որ Ազատության հրապարակում հացադուլի է նստել նոր նախաձեռնող խմբի անդամ Դավիթ Սանասարյանը, իսկ 4 երիտասարդները, ովքեր հացադուլի էին սկսել երկու օր առաջ, արդեն դադարեցրել են այն:

Հարցին, թե ի՞նչ կարծիք ունի հացադուլի դիմած քաղաքացիների մասին, Շուշանյանը պատասխանեց. «Չեմ ուզում կարծիքս ասել, քանի որ ցանկացած մարդ ինքն է ընտրում` ինչպես պայքարել: Այս պահին կարևոր չէ իմ կարծիքը հացադուլի մասին, կարևորը` որ մարդը էդպես է տեսնում իր պայքարի ճանապարհը, ու, բացի ողջունելուց,  ուրիշ ավելի բան չեմ կարող ասել»:

Իսկ ինքը կդիմե՞ր հացադուլի: Այս հարցին պատասխանեց. «Դա ինձ համար ծայրահեղություն է, ինչին չեմ դիմի»: