Կոմիտասն ու Նարեկացին ամբողջ Հայաստանն են. Արտո Չաքմաքչյան

Երեկ «Գաֆեսճյան» արվեստի կենտրոնում բացվեց «Արտո Չաքմաքչյան. վերածնունդ» խորագրով ցուցադրությունը: Ներկայացված են մեծանուն արվեստագետ Արտո Չաքմաքչյանի քանդակները և գրաֆիկական աշխատանքները, որոնցում մեծ տեղ են զբաղեցնում Գրիգոր Նարեկացուն և Կոմիտասին պատկերող աշխատանքները:

Yerkir.am-ի հետ զրույցում Չաքմաքչյանը նշեց, որ անկախ Հայաստանում սա իր առաջին ցուցադրությունն է: «60-70-ականների արանքում եղած գործերն են ցուցադրվում: Մեկը` «Քայլող մարդը», շատ ծանոթ է բոլորին: Դա ժողովրդի համար եմ արել` այն ժամանակ ցույց տալու, որ ժողովուրդը սկսեց քայլել. չխառնե՛լ` ոչ թե տեղաշարժվել, այլ քայլել»,- ասաց վարպետը:

Չաքմաքչյանի աշխատանքներից երեքում Կոմիտաս է պատկերված: Ըստ վարպետի` Հայաստանի ամեն մի շարժում Կոմիտասով է արտահայտում: «Ես երբեք ինձ չեմ ստիպում Կոմիտասի քանդակ ստեղծելու համար, այն ուղղակի ծնվել է իմ մեջ: Նարեկացին ինձ համար մտածելու կերպար է, Կոմիտասը մեր հոգևոր աշխարհն է ցույց տալիս: Այդ երկուսը միասին ամբողջ Հայաստանն է»,- ասաց նա:

Ի դեպ, ցուցադրությունը կտևի մինչև օգոստոսի 30-ը: Այսօր և վաղը, ինչպես նաև օգոստոսի 23-30-ը մուտքն անվճար է: