Կարեն Անդրեասյանը խուսափեց գնահատական տալ Վլադիմիր Գասպարյանի հայտարարություններին

ՀՀ մարդու իրավունքների պաշտպան Կարեն Անդրեասյանն այսօր լրագրողներին հայտնեց, որ Բաղրամյան պողոտայում հունիսի 23-ին տեղի ունեցած դեպքերի վերաբերյալ իրենց դիրքորոշումը կլինի կոնկրետ տեքստի տեսքով: «Մեր որոշումն առաջիկայում կհրապարակենք»,- հայտարարեց նա:

Պատասխանելով հարցին, թե ինչպե՞ս է վերաբերվում ոստիկանապետ Վլադիմիր Գասպարյանի վարքագծին, ով անընդհատ սպառնում էր, թե ոստիկանությունը «մաքրելու է» տարածքը, ՄԻՊ-ն ասաց, որ ինքն անհատական գնահատականներ չի հնչեցնում։ «Իրավաչափության տեսանկյունից մեզ մտահոգել է բացառապես հունիսի 23-ի դեպքը, և կմտահոգեն այն դեպքերը, եթե ոստիկանությունը չգործի պատշաճ՝ սադրիչների դեպքում: Մնացած բոլոր դեպքերը զուտ մարդկային գնահատականների դաշտում են»,- ասաց նա։

Դիտարկմանը, թե որոշում կայացնող մարդն անընդհատ հարձակվում էր քաղաքացիների վրա` ասելով` ինքը Վովա Գասպարյանն է, Անդրեասյանն արձագանքեց, որ ինքը դիմում չի ստացել, որ ոստիկանապետի կողմից հարձակում է տեղի ունեցել։

Ըստ նրա` իրենք ուրախ են, որ ոստիկանները հանդուրժողականություն են դրսևորում և գործողությունների չեն դիմում: «Երեկ ամբողջ գիշեր իմ տեղակալը և մեր ներկայացուցիչը եղել են Բաղրամյան պողոտայում, այցեր են կատարվում, դիտարկումներ են կատարվում, և այսօր բողոքները հիմնականում այն մասին են, որ կան սադրիչներ»,- ասաց Անդրեասյանը: Նա շեշտեց այն հանգամանքը, որ ոստիկանները հենց այդ սադրիչների նկատմամբ պետք է ավելի զգույշ և հետևողական լինեն: