«Ինտեր ՌԱՕ»-ն պատրաստ է վաճառել ՀԷՑ-ը. Коммерсантъ

Հայաստանում էլեկտրաէներգիայի սակագնի բարձրացման դեմ բողոքները և իշխանությունների խոստումը` ազգայնացնել «Հայաստանի էլեկտրական ցանցերը» կարող են ստիպել ռուսական «Ինտեր ՌԱՕ»  ընկերությանը վաճառել իր դուստր ընկերությունը. գրում է Коммерсантъ-ը։

«Ռուսական հոլդինգն արդեն բանակցություններ է վարել հայազգի գործարարների հետ, այդ թվում՝ «Տաշիր» խմբի սեփականատեր Սամվել Կարապետյանի: Սակայն նոր սեփականատեր գտնելը հեշտ չէ. սակագների անհավասարակշռությունը հանգեցրել է նրան, որ ընկերությունը զգալի պարտքեր է կուտակել, իսկ ցուցարարները պահանջում են, որ իշխանությունները չփոխհատուցեն ընկերության կորուստները պետական բյուջեից»,- գրում է թերթը։

Коммерсантъ-ը, իր աղբյուրներին վկայակոչելով, հաստատում է, որ հոլդինգը պատրաստ է հրաժարվել խնդրահարույց ակտիվից:

Թերթի երևանյան զրուցակիցը պնդում է, որ ՀԷՑ-ը ձեռք կբերի գործարար Սամվել Կարապետյանը. բանակցությունները սկսվել են դեռ մինչ էլեկտրաէներգիայի սակագնի բարձրացումը: Սակայն «Տաշիր գրուպ»-ի ներկայացուցիչները հերքել են տեղեկությունը:

Սակայն թերթի այլ աղբյուր, ով ծանոթ է երևանյան էներգետիկ վիճակին, հաստատում է Սամվել Կարապետյանի, ինչպես նաև այլ գործարարների հետ վաճառքի մասին բանակցությունների փաստը: