Սակագնի աճի 73 %-ը բաժին է հասնում ՀՀ այլ էլեկտրաէներգետիկ ձեռնարկություններին. «Ինտեր ՌԱՕ»

Միայն 2014-ին  «Հայաստանի էլեկտրական ցանցեր»-ի վնասը սակագնային կարգավորման թերացումների պատճառով աճել է 8 տոկոսով և կազմել 10,7 մլրդ դրամ։ Այս մասին ТАСС-ին ասել է «Ինտեր ՌԱՕ»-ի ղեկավար խորհրդի անդամ, ռազմավարության եւ ներդրումների բլոկի ղեկավար Իլնար Միրսիյապովը։

«Գործող սակագնային կարգավորումը չի երաշխավորում ՀԷՑ-ի եկամուտները եւ հանգեցնում է քրոնիկ վնասների»,- պարզաբանել  է նա՝ նշելով, որ ՀԷՑ-ի սակագնային շահույթը վերջին հինգ տարիներին նվազել է ավելի քան 2 անգամ՝ 50%-ից հասնելով 23 %-ի։

«Դա նշանակում է, որ սպառողական սակագների բարձրացումից ստացվող լրացուցիչ եկամուտները ստացել են հոսանք արտադրող ընկերությունները, այլ ոչ թե ՀԷՑ-ը։ Եվ սակագնի աճի 73 %-ը բաժին է հասնում հանրապետության այլ էլեկտրաէներգետիկ ձեռնարկություններին»,- ասել նա:

Բացի այդ, ըստ Միրսիյապովի,  ՀԷՑ-ն իր  վրա է վերցնում գլխավոր ռիսկերը. հենց ընկերության վրա է ազդում էլեկտրաէներգիայի ոլորտի հաշվեկշռի խախտումը, որի պատճառով ընկերությունը 2012-ից ի վեր անընդհատ վնասներ է կրում։ Արդյունքում` ՀԷՑ-ը ստիպված է լինում վարկ վերցնել, ինչն ավելի է բարդացնում իրավիճակը։ «2015-ին բացասական միտումը շարունակվում է»,- ասել է նա: