Եկել եք շուլո՞ւխ անելու. Նազարյանը՝ «Հայկանդուխտ» ավանդապաշտ կանանց» նախագահին

Հանրային ծառայությունները կարգավորող հանձնաժողովում շարունակվում են էլեկտրաէներգիայի սակագնի բարձրացման հարցի քննարկումները:

Նշենք, որ նիստին ներկա է նաեւ Անի Զախարյանը: Նա շարունակ վեճի բռնվում ինչպես ՀԾԿՀ նախագահ Ռոբերտ Նազարյանի, այնպես էլ քննարկման մասնակիցների հետ: Իրավիճակը փոքր-ինչ խառնաշփոթային դարձավ, եւ Նազարյանը Զախարյանին առաջարկեց լքել դահլիճը: Վերջինս, բնականաբար, հրաժարվեց: Ներկաներից մեկի հետ վեճի ժամանակ էլ Զախարյանը շպրտեց. «Երկիրը կործանվում է, դուք այստեղ ծիծաղում եք»:

Նիստին ներկա է նաեւ «Հայկանդուխտ» ավանդապաշտ կանանց» ժողովրդավարական կուսակցության նախագահ Արմենուհի Ղազարյանը: Նա հարց հնչեցրեց հաջորդ տարի սակագնի հնարավոր իջեցման մասին: Նշենք, որ Ղազարյանը շփոթել էր հանձնաժողովի ներկայացուցիչ Գարեգին Բաղրամյանին եւ հանձնաժողովի նախագահ Ռոբերտ Նազարյանին: Ղազարյանը պնդում էր, որ սակագնի իջեցման մասին իր հարցին պատասխանի Նազարյանը, մինչդեռ` այդ մասին երեկ խոսել էր Բաղրամյանը: «Եկել եք շուլո՞ւխ անելու»,- ասաց Նազարյանը: Սակայն, այնուամենայնիվ, նշեց մի քանի դեպքեր, երբ սակագնի նվազում է եղել` մասնավորապես` ընդգծելով հեռահաղորդակցության ոլորտը: