Աշոտյանը եղել է իմ ընկերը, ափսոսում եմ, որ նրա վերաբերմունքը փոխվել է. Թոքմաջյան

Պոլիտեխնիկի ռեկտորի ժամանակավոր պաշտոնակատար Հովհաննես Թոքմաջյանն այսօր լրագրողների հետ հանդիպում էր կազմակերպել:

Թոքմաջյանը նշեց, որ համաձայն է ՀՀ ԿԳ նախարար Արմեն Աշոտյանի այն հայտարարությանը, որ ընտրություններից հետո բուհում պետք է վերականգնվի բարոյական և կրթական մթնոլորտը:

Yerkir.am-ի հարցին, թե ի՞նչ ասել է, որ ինքը համաձայն է ԿԳ նախարարի հետ, այսինքն` Թոքմաջյանը փաստո՞ւմ է, որ, իրոք, վերջին շրջանում աղճատվել է բուհի կրթական և բարոյական մթնոլորտը, նա պատասխանեց, թե օրենքներում նշված է` պաշտոնյաների խոսքը պետք է հասկանալ տառացի:

«Աշոտյանը եղել է իմ ընկերը, և ես շատ եմ ափսոսում նրա վերաբերմունքի փոփոխման համար: Կարծում եմ` նա լավ ինֆորմացված չէ. ցանկացած բուհում նա ունի իր մարդիկ, այդ թվում` այստեղից ինչ-ինչ երիտասարդներ, ովքեր ապատեղեկատվություն են ներկայացրել նրան: Համոզված եմ, որ հետաքննությունից և ընտրություններից հետո նա ճիշտ գնահատական կտա, և կուզենայի, որ նա օբյեկտիվ լինի»,- ասաց Թոքմաջյանը` հավելելով, որ նախարարները, ռեկտորները գալիս-գնում են, բուհն է արժեք, այն մնում է: