Բրիտանա-ամերիկյան «Ջակոբս»-ն է «Նաիրիտ»-ում տեխնիկական աուդիտ անցկացրել

Այսօր` ԱԺ-ում էներգետիկ ոլորտի` 2014թ. բյուջեի կատարողականի քննարկման ժամանակ, ՀԱԿ խմբակցության ղեկավար Լևոն Զուրաբյանը հարց ուղղեց էներգետիկայի փոխնախարարին «Նաիրիտ»-ի վերաբերյալ: Նա նշեց, որ նամակ է գրել կառավարությանը «Նաիրիտ»-ի վերագործարկման վերաբերյալ, և նախարար Երվանդ Զախարյանը պատասխանել է այդ նամակին, որում գրված է, որ «Նաիրիտ»-ի շուրջ ստեղծված ծանր իրավիճակի պատճառով կառավարությունը դիմել է Համաշխարհային բանկին, որ աուդիտ անցկացնեն գործարանում: Արդեն ստացվել են աուդիտի պատասխանները, ըստ որոնց` գործարանի հետագա շահագործումը համարվել է ոչ նպատակահարմար: «Ինչո՞ւ է կառավարությունը այդ հարցով դիմել Համաշխարհային բանկին, ո՞ր ընկերությունն է իրականացրել այդ աուդիտը: Արդյո՞ք կառավարությունը տեղյակ է, որ նման աուդիտ արդեն անցկացվել է և ոչ մեկ անգամ»,- հարցրեց պատգամավորը:

Փոխնախարարը նշեց, որ Համաշխարհային բանկը ՀՀ կառավարության կարևոր գործընկերներից մեկն է, ունի խոշոր օբյեկտներում տեխնիկական աուդիտ անցկացնելու փորձ: Եվ կառավարությունը դիմեց Համաշխարհային բանկին, որ անցկացնի տեխնիկական աուդիտ: Աուդիտն իրականացրել է ամերիկյան ընկերության բրիտանական մասնաճյուղը` «Ջակոբս» անունով: