Սերժ Սարգսյանը եւ մի շարք բարձրաստիճան պաշտոնյաներ՝ Ռոբերտ Քոչարյանի մոր հոգեհանգստին

Արդեն հայտնել ենք, որ այսօր 18:00-ին պետք է տեղի ունենար ՀՀ երկրորդ նախագահ Ռոբերտ Քոչարյանի մոր` Էմմա Օհանյանի հոգեհանգստի արարողությունը:

 Ինչպես հայտնում է yerkir.am-ի թղթակիցը` այս պահին Սուրբ Հովհաննես եկեղեցու բակում են գտնվում մի շարք բարձրաստիճան պաշտոնյաներ` նախագահ Սերժ Սարգսյանը` առաջին տիկնոջ` Ռիտա Սարգսյանի հետ, վարչապետ Հովիկ Աբրահամյանը, ԱԺ նախագահ Գալուստ Սահակյանը, ԱԺ փոխխոսնակ Էդուարդ Շարմազանովը, Տրանսպորտի և կապի նախարար Գագիկ Բեգլարյանը, Էկոնոմիկայի նախարար Կարեն Ճշմարիտյանը, Էներգետիկայի նախարար Երվանդ Զախարյանը, ՀԾԿՀ նախագահ Ռոբերտ Նազարյանը:

Հոգեհանգստի արարողությանն են մասնակցում նաև ՀՅԴ խմբակցության պատգամավորներ Արմեն Ռուստամյանը, Արծվիկ Մինասյանը, Աղվան Վարդանյանը, ԲՀԿ ղեկավար Նաիրա Զոհրաբյանը, ԲՀԿ-ականներ Միքայել Մելքումյանը, Վահե Էնֆիաջյանը, ինչպես նաև ՀՀԿ-ական պատգամավորներ, ՍԴ նախագահ Գագիկ Հարությունյանը, վարչապետ Հովիկ Աբրահամյանի որդին` Արտաշատի քաղաքապետ Արգամ Աբրահամյանը, նաև Երևանի քաղաքապետ Տարոն Մարգարյանը: Հոգեհանգստին մասնակցում է նաև ՀՀ ԶՈՒ գլխավոր շտաբի պետի տեղակալ Մովսես Հակոբյանը:

Այստեղ են Քոչարյանների ընտանիքի անդամները` այդ թվում կրտսեր որդու կինը` երգչուհի Սիրուշոն: 

Ուշագրավ է, որ հոգեհանգստյան արարողությանը ներկա չէին ԿԳ նախարար Արմեն Աշոտյանը, Սփյուռքի նախարար Հրանուշ Հակոբյանը, Մշակույթի նախարար Հասմիկ Պողոսյանը և մի շարք այլ պաշտոնյաներ: