Թուրքիայում պահանջատիրության երթ կկայանա

Վաղը Թուրքիայում կկայանա երթ՝ հայկական «Արմեն» ճամբար-որբանոցը հայ համայնքին վերադարձնելու պահանջով. տեղեկացնում է «Ակօս»-ը:

Երթը կազմակերպել են «Նոր Զարթօնք», «Արմեն ճամբար համերաշխություն» և այլ միություններ:

Հայկական որբանոցի ոչնչացման դեմ պայքարի մասին իրազելու համար բացված ֆեյսբուքյան էջում տարածված կոչում ասվում է. «Հայ որբերի ձեռքերով կառուցված «Արմեն» ճամբարը պայքարում է ոչնչացման դեմ: Հրանտ Դինքի ժառանգություն այս ճամբարի պաշտպանության համար մայիսի 22-ին` ժամը 19.00-ին, հանդիպում ենք Թունելում և բարձրաձայնում աշխարհում և Թուրքիայում միլիոնավոր մարդկանց պահանջը: Թող հենց հիմա վերադարձվի ճամբարը՝ առանց պայմանի»:

Հիշեցնենք, որ օրեր առաջ Թուրքիայի վարչապետ Ահմեդ Դավութօղլուն խոստացել էր անձամբ միջամտել հայկական որբանոցի ոչնչացման վերաբերյալ հարցին: