Պալաչը կասկածում է Ծառուկյանին

Երեկ ավարտվել է Աբովյանի քաղաքապետի արտահերթ՝ հունիսի 7-ին նշանակված ընտրություններում առաջադրումների փուլը: Առաջադրված թեկնածուների թիվը հասել է 6-ի:

Ուշագրավ է, որ, բացի Պալաչ մականվամբ հայտնի Արթուր Գեղամի Հարությունյանից, նույն անուն-ազգանունով ևս մեկ թեկնածու է առաջադրվել, և հայրանունը ևս տարօրինակ զուգադիպությամբ համընկնում է:

Yerkir.am-ի հետ զրույցում Արթուր Հարությունյանը` Պալաչը, նշեց, որ այս երևույթի հեղինակները նրանք են, ովքեր վախենում են պարտությունից: Մեր այն դիտարկմանը, թե գուցե ԲՀԿ նախկին առաջնորդ Գագիկ Ծառուկյա՞նն է այս ամենի հեղինակը, նա պատասխանեց. «Կարող է, իհարկե, կարող է, ամեն ինչ էլ կարող է»:

Արթուր Հարությունյանը, անդրադառնալով Գագիկ Ծառուկյանի թիկնազորի կողմից «Աբովյան» հեռուստաընկերության լրագրողների` բռնության ենթարկվելու մասին լուրերին, նշեց, որ այդ մասին տեղեկացել է քիչ առաջ` հեռախոսով: «Տնօրենի հետ խոսեցի, իմացա»,- ասաց նա:

Մեր հարցին, թե ինչ-որ բան չի՞ պատրաստվում ձեռնարկել տեղի ունեցածի կապակցությամբ, Հարությունյանը պատասխանեց. «Ես ի՞նչ պետք է ձեռնարկեմ: Ամեն ինչ պետք է օրենքի սահմաններում լինի, օրենքին համապատասխան: Օրենքը կձեռնարկի` ինչ պետք է»: