Պալաչը Հայաստանը «օրինական երկիր» հռչակեց

«Քինգ դե լյուքս» ՍՊ ընկերության սեփականատեր, ԲՀԿ նախկին առաջնորդ Գագիկ Ծառուկյանի հետ նախկինում լարված հարաբերություններով աչքի ընկած Արթուր Հարությունյանը՝ Պալաչը, Yerkir.am-ի հետ զրույցում հայտարարեց՝ եթե ուրիշների համար ինչ-որ բան փոխվել է, ինքը շարունակում է վստահ լինել, որ ընտրվելու է Աբովյանի քաղաքապետ: «Ես վստահ եղել եմ, վստահ եմ և վստահ էլ կլինեմ: Դրա մասին չենք խոսում»,- հայտարարեց նա:

Ուշագրավ է, որ Հարությունյանը շեշտեց, թե ընտրություններից առաջ իր անունը մամուլում շատ շրջանառելն իբր վնասակար է իր համար: «Բոլոր թեկնածուներն էլ նորմալ թեկնածուներ են, բոլորն էլ ունեն ընտրազանգված: Ժամը կգա, կհայտարարվի ընտրությունների օրը, կխոսենք: Հիմա ավելորդ է ավելին ասելը: Իմ տրամադրվածությունը, իմ վստահությունը, որևէ բան չի փոխվել, ամեն ինչ նույնն է: Կգա օրը, կհայտարարեն ընտրությունները, թեկնածուները կառաջադրվեն, ու արդեն ամեն ինչ պարզ կլինի»,- ասաց նա:

Մեր այն հարցին, թե ինչ-որ մեկի, իսկ ավելի կոնկրետ՝ գուցե իշխանությունների թույտվության ու հովանու ներքո՞ է թեկնածուների վստահությունը աճում, Հարությունյանը պատասխանեց. «Ես չեմ ճանաչում մի հատ ընտրություն, որ իշխանությունների թույլտվությամբ է անցել, դա լինում է միայն անօրիանական երկրներում: Ես մեր երկիրը համարում եմ օրինական երկիր: Ընտրություն է, ով կամենում է, առաջադրվում է, ով կարողանում է, հաղթում է և աշխատում»:

Արթուր Հարությունյանը նշեց նաև, որ իր հարաբերությունները Գագիկ Ծառուկյանի փեսայի՝ Կոտայքի նորանշանակ մարզպետ Կարապետ Գուլոյանի հետ լավ են, և ընտրվելու դեպքում ինքը կարող է աշխատել նրա հետ: «Մեր հարաբերությունները շատ լավ են: Իմ հարաբերությունները բոլորի հետ էլ լավ են: Ծառուկյանի փեսայի հետ էլ, Ծառուկյանի հետ էլ, բոլորի հետ էլ իմ հարաբերությունները շատ նորմալ են, շատ դրական են»,- ընդգծեց նա: