Բոլոնիայի գործընթացի երկրները Երևանի կոմյունիկեին կողմ են

Բոլոնիայի նախագահական գագաթաժողովում քննարկվեցին նաև Երևանի կոմյունիկեի /համաձայնագիր/ դրույթները: Ի դեպ, վաղը վերջնականապես դրանք կամփոփվեն, և քվեարկության դրվելուց հետո կոմյունիկեն կընդունվի կամ ոչ:

Լեհաստանի պատվիրակության ներկայացուցիչը նշեց, որ գուցե սա մինչ այս եղած բոլոր կոմյունիկեներից ամենալավն է:

Կիպրոսի ներկայացուցիչն էլ, իր հերթին, ասաց, որ իրենք նույնպես համաձայն են հայկական կողմի կազմած կոմյունիկեի հետ: «Ամենակարևոր կետը, իմ կարծիքով, այն է, որ մենք պետք է ավելի ներառական դարձնենք բարձրագույն կրթությունը, ինչն էլ սահմանված է կոմյունիկեում»,- նշեց նա:

Բելգիայի ներկայացուցչի կարծիքով` Երևանի կոմյունիկեն ներկայացնում է իրենց բոլորի ընդհանուր տեսլականը կրթության ոլորտում: «Սակայն այս ամենը չպետք է մնա թղթի վրա: Բրյուսելում, օրինակ, մենք որակավորման հետ կապված նախագիծ ընդունեցինք, որը, սակայն, չգործեց, և ստիպված եղանք նոր նախագիծ մշակել: Կուզեի կոմյունիկեի մեջ մի կետ ավելացվեր` Եվրոպայում և աշխարհում պետք է մեծ ուշադրություն դարձնեն համագործակցության զարգացմանը, նորարարություններին և գիտահետազոտական աշխատանքներին»,- ասաց նա:

Բոլոնիայի գործընթացին անդամակցող երկրների պատվիրակությունների ներկայացուցիչները նշեցին, որ դժվար է ունենալ համաձայնագիր, որը 47 երկրների պահանջները կբավարարի, սակայն հայկական կողմն արել է ամեն ինչ` համաձայնագիրը ամբողջական և ընդունելի դարձնելու համար:

Կոմյունիկեի քննարկումը շարունակվում է. Բոլոնիայի գործընթացի անդամ երկրները բոլորն էլ դրական են արտահայտվում համաձայնագրում եղած ընդհանուր դրույթների մասին` դրանցում միայն ինչ-ինչ լրացումներ անելու առաջարկներ ներկայացնելով: