Սամվել Ալեքսանյանը կհովանավորի Ցեղասպանության թեմատիկայով նկարահանվող ֆիլմերը

Ցեղասպանության 100-րդ տարելիցին նվիրված 18 ֆիլմ է նկարահանվում, և գրեթե բոլորն էլ ավարտական փուլում են: Այս մասին այսօր լրագրողներին հայտնեց ՀՀ մշակույթի նախարար Հասմիկ Պողոսյանը: Նա տեղեկացրեց, որ ֆիլմերից 5-ը գեղարվեստական են, 12-ը` վավերագրական, իսկ մեկը` անիմացիոն:

Ի դեպ, ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումների համակարգող Վիգեն Սարգսյանը տեղեկացրեց, որ ֆիլմերի նկարահանման ֆինանսավորումն իր վրա է վերցրել ԱԺ ՀՀԿ խմբակցության պատգամավոր Սամվել Ալեքսանյանը:

Ինչ վերաբերում է հարցին, թե արդյո՞ք ֆիլմերի նկարահանումը չի ուշացել, նախարարը պատասխանեց` ոչ, ավելի լավ, ամբողջ տարվա ընթացքում դրանք կշրջանառվեն: «Շտապելու ոչ մի բան չունենք, ընդհակառակը` մենք պետք է ստեղծագործողներին ժամանակ տանք, որ հանգիստ աշխատեն: Չնայած գիտեմ նաև, որ ինչ էլ լինի, միևնույն է, արդյունքը չի գոհացնելու հասարակությանը, նման ֆիլմերն արժևորում ենք դրանց ստեղծվելուց տարիներ անց միայն»,- ասաց նա: