Պուտինն այդքան ծուռ քաղաքականություն չի վարի. Կիրո Մանոյան

Այս օրերին քննարկվում է ՌԴ նախագահ Վլադիմիր Պուտինի այցը Հայաստան: Արդյո՞ք նա կգա` մասնակցելու ապրիլի 24-ին Հայոց ցեղասապանության 100-ամյա տարելիցի միջոցառումներին: 

Yerkir.am-ի այս հարցին ՀՅԴ Բյուրոյի անդամ, Հայ դատի եւ քաղաքական հարցերի գրասենյակի պատասխանատու Կիրո Մանոյանը պատասխանեց. «Ես չեմ հասկանում` ինչո՞ւ չպետք է գա, եթե ասել է, որ գալու է»:

Նա չի հասկանում, թե ինչո՞ւ հանկարծ սկսեցին խոսել, որ Պուտինը կարող է և չգալ Հայաստան, մանավանդ, երբ ՀՀ նախագահը և Պուտինը հեռախոսազրույցում երկկողմանի պայմանավորվել են, որ հաջորդ հանդիպումները լինելու են Երևանում, երբ Պուտինը կգա ու կմասնակցի Հայոց ցեղասպանության հիշատակի միջոցառումներին, նաև Մոսկվայում, երբ ՀՀ նախագահը կմեկնի այնտեղ` Հայրենական Մեծ պատերազմի տարեդարձին նվիրված միջոցառումներին մասնակցելու:

«Այդքանը երկու նախագահներով համաձայնել են, հիմա ի՞նչ է եղել, որ խոսում են Պուտինի չգալու մասին, ես չգիտեմ»,- ասաց Կիրո Մանոյանը:

Ինչ վերաբերում է այն փաստին, որ ՌԴ Պետդումայի նախագահ Սերգեյ Նարիշկինը կմեկնի Թուրքիա` Գալիպոլիի ճակատամարտին նվիրված միջոցառումներին մասնակցելու, Կիրո Մանոյանը նշեց, որ դա էլ զարմանալի չէ, որովհետև սպասել, որ Ռուսաստանն իր հարաբերությունները պետք է խզի Թուրքիայի հետ ապրիլի 24-ի համար, սխալ է: Հարցն այն է, թե ո՞ր միջոցառմանը նրանք կտան իրենց նախապատվությունը:

«Թուրքիայի ուզածն այն չէր, որ մարդիկ նաև գտնվեն Անկարայում: Թուրքիայի ուզածն այն էր, որ մարդիկ Անկարա գնան, բայց Հայաստա չգան: Իմ կարծիքով` Պուտինը չի գնա Թուրքիա, չեմ բացառում, իհարկե, բայց չեմ կարծում նա այդքան ծուռ քաղաքականություն կվարի, մանավանդ, որ արդեն ասել է, որ գալու է Հայաստան»,- ասաց Կիրո Մանոյանը: