Ապրիլմեկյան սուտ. պատգամավորները ստել չեն կարողանում

Ապրիլի 1-ը Ծիծաղի և հումորի համաշխարհային օրն է: ՀՀ կառավարությունը, 2006 թվականի հատուկ որոշմամբ, այդ օրը պետականորեն ճանաչեց որպես Հումորի և երգիծանքի օր: Օրվա խորհրդին ընդառաջ՝ Yerkir.am-ը զանգահարեց ՀՀ տարբեր քաղաքական գործիչների՝ ծանոթանալու համար նրանց ապրիլմեկյան պատկերացումներին:

ԱԺ պատգամավոր, նախկին ԲՀԿ -ական Բազմասեր Առաքելյանին խնդրեցինք մի այնպիսի բան ասել, որ ժողովուրդն ասի՝ սուտ է: Նա մեր այդ խնդրանքին արձագանքեց այսպես. «Վայ, ես ո՞նց կարող եմ սուտ ասել, ախր ես ստից այնքան հեռու մարդ եմ: Հասկանո՞ւմ եք, ես չեմ կարող սուտ ասել»: Նա մեզ խոստացավ հիշելուն պես զանգահարել և պատմել, թե իր կյանքի ընթացքում ինչ-որ կատակ արե՞լ է, արդյոք, որը հիշվել է:

ԲՀԿ-ական պատգամավոր Աբրահամ Մանուկյանը, բավական խանդավառված մեր ոչ քաղաքական հարցադրումներով, հայտարարեց. «Դժվար կարողանամ մի այնպիսի բան ասել, որ ժողովուրդը ասի՝ սուտ է, որովհետև ես ինչ ասեմ, կհավատան իմ ասածին, կասեն` ճիշտ է»: Նա նշեց նաև, որ չի հիշում ապրիլմեկյան մի այնպիսի կատակ, որը հիշատակության է արժանի:

ՀԱԿ պատգամավոր Գագիկ Ջհանգիրյանին երբ խնդրեցինք հիշել որևէ կատակ, որն առավել տպավորվել է իր հիշողության մեջ, զարմացած հարցրեց. «Ինչի, էսօր ի՞նչ օր է որ»: Երբ լուսավորեցինք, պատգամավորը «ստել չկարողացավ»:

ՀՀԿ խմբակցության պատգամավոր Խոսրով Հարությունյանը ևս հայտարարեց, որ ինքն ունակ չէ այնպիսի մի բան ասել, որ ժողովուրդն ասի՝ սուտ է: «Ես դժվար կարողանամ այնպես ստել, որ հավատացնեմ մարդկանց: Ես ընդունակ չեմ շատ մեծ սուտ ասելու»,- ասաց ՀՀԿ-ականը: