Սպորտի նախարարը դրական է համարում ՀԱՕԿ-ի որոշումը

ՀՀ սպորտի և երիտասարդության հարցերի նախարար Գաբրիել Ղազարյանը դրական է համարում Հայաստանի ազգային օլիմպիական կոմիտեի գործկոմի որոշումը Բաքվում կայանալիք Եվրոպական խաղերին հայ մարզիկների մասնակցության վերաբերյալ:

Նախարարի կարծիքով` անկախ նրանից, թե ինչ որոշում կկայացվի ՀԱՕԿ-ի կողմից, մարզաձևերի ազգային ֆեդերացիաները պարտավոր են իրենց բնականոն շարունակական աշխատանքներն իրականացնել հայ մարզիկներին նշված խաղերին նախապատրաստելու ուղղությամբ: Նախարարը կարևոր է համարում, որ անձամբ Միջազգային օլիմպիական կոմիտեի և Եվրոպական օլիմպիական կոմիտեի նախագահների կողմից տրվել են հայ մարզիկների անվտանգությունն ապահովող երաշխիքներ:

Նախարար Ղազարյանը համարում է նաև, որ հայ մարզիկների չմասնակցելն այդ խաղերին հնարավոր է վնաս հասցնի ոչ միայն նրանց մարզական կենսագրությանը, այլ նաև Հայաստանի վարկանիշին միջազգային մարզական ասպարեզներում: Այս մասին իր ֆեյսբուքյան էջում գրել է նախարարի մամուլի քարտուղար Աստղիկ Մարտիրոսյանը: