Սպորտի նախարարը կիսում է պոլիտեխնիկի լողավազանի այցելուների մտահոգությունը

Օրերս Yerkir.am-ը հրապարակել էր պոլիտեխնիկի լողավազանի մի խումբ այցելուների և մարզիկների բաց նամակը ՀՀ սպորտի և երիտասարդության հարցերի նախարար Գաբրիել Ղազարյանին:

Նախարարն արձագանքել է այդ բաց նամակին: Արձագանքը ստորեւ.

«Հարգելի մարզիկներ և լողորդներ, տեղեկացա« Պոլիտեխնիկի» լողավազանում ներկայումս ընթացող վերանորոգման աշխատանքների ժամկետների վերաբերյալ ձեր բարձրացրած հարցին: Նախ ցանկանում եմ նշել, որ ուրախացել եմ ձեր ակտիվ մարզական կյանքով ապրելու փաստից և կիսում եմ ձեր մտահոգությունը` նախընտրելի լողավազանում ժամանակավորապես մարզվելու հնարավորություն չունենալու համար: Միաժամանակ տեղեկացնում եմ, որ« Պոլիտեխնիկի» լողավազանը գտնվում է ՀՀ կրթության և գիտության նախարարության ենթակայության տակ, հետևաբար այնտեղ կատարվող վերանորոգման աշխատանքները, լողավազանի աշխատանքային գրաֆիկը, ինչպես նաև սակագները ՀՀ սպորտի և երիտասարդության հարցերի նախարարության իրավասության տակ չեն գտնվում: Հետևաբար ինձ մնում է հույս հայտնել, որ վերանորոգման աշխատանքներն ավարտվելուն պես, լողավազանը պահպանելով ավանդույթը, կշարունակի հյուրընկալել լողով զբաղվել ցանկացող շատ ու շատ քաղաքացիների»: