Տաքսու վարորդները դարձյալ բողոքում են

Այսօր լրագրողների հետ հանդիպման ժամանակ անհատ տաքսիստները հայտարարեցին, թե 19 կետից բաղկացած գրավոր պահանջ են ներկայացնելու Սերժ Սարգսյանին, իսկ կիրակի օրը` ժամը երկուսի սահմաններում, հավաքվելու են Հրազդան մարզադաշտի մոտակայքում, ներկայացնելու իրենց պահանջները, այնուհետև ավտոերթ են անելու: Տաքսիստները պահանջում են հանել «անհավասարությունները»,  թեթեւացնել հարկային բեռը, նվազեցնել կայանատեղիների համար սահմանված վճարը:

«Գյուղական համայնքներում գրանցված տաքսիստներից պահանջում են 5000 դրամ, իսկ մեզանից 12000 դրամ: Բա դա արդա՞ր է: Ես չեմ ասում` գյուղում վարի մեքենա, մենք էլ քաղաքում, և տարբերություն չլինի, բայց եթե գյուղական համայնքում գրանցված տաքսիստը ինձ նման քաղաքում է վարում մեքենան, ո՞րն է էլ տարբերությունը: Պահանջում ենք վերանայել այս կետն` անպայման: Կապարակնքման համար պահանջում են 2400 դրամ, բայց բոլորիս է հայտնի, թե տաքսիստները ինչպես կարող են փոխել հաշվիչի ցուցմունքը: Այս թիվը որտեղի՞ց են վերցրել: Ո՞վ է սահմանել այդ գումարը: Հաշվիչի կապարակնիքը ի՞նչ է` ոսկո՞ւց է: Հաջորդ հարցը գազաբալոնների ակտի հետ կապված է: Էլի կոռուպցիոն տեղ է ստեղծվում: Ինչի՞ համար 10000 դրամ տանենք, տանք: Սրանք անհեթեթ օրենքներ են»,- հայտարարեց վարորդներից մեկը:

Դիտարկմանը, թե ինչո՞ւ են բողոքում, եթե հարկային բեռն իրականում թեթեւացել է, եւ ի վերջո, չեն կարող լրիվ օրենքից դուրս աշխատել, վարորդները չկարողացան պատասխանել:

Նշենք, որ նոր օրենքով անհատ տաքսիստների ամսական հարկը` 14.500 դրամը, նվազեցվել է` դառնալով 12.000 դրամ` Երևանի համար: Հանրապետության մյուս քաղաքներ համար հարկը կազմում է ամսական 8000 դրամ, իսկ գյուղական համայնքների անհատ տաքսիստները պետք է վճարեն 5000 դրամ` ամսական: Անհատ տաքսիստների համար վերացել է նաև տարեկան 25.000 դրամ պետական տուրքի պահանջը: Իսկ տաքսի ծառայությունների համար` մինչև 4 մեքենայի համար, տարեկան պետական տուրքը կազմում է 100.000 դրամ` նախկին 200.000 դրամի փոխարեն: