Գյումրիի սպանդի գործով ևս երկու ներկայացուցիչ է ներգրավվել

Հունվարի 12-ին Գյումրիում Ավետիսյանների ընտանիքի անդամների սպանության դեպքի առթիվ հարուցված քրեական գործով տուժողների ևս երկու իրավահաջորդների ներկայացուցիչներ են ներգրավվել: Նրանք են ՀՔԱ Վանաձորի գրասենյակի ղեկավար Արթուր Սաքունցն ու իրավաբան Արայիկ Զալյանը, ովքեր ներկայացնում են Ավետիսյանների հարսի՝ Արաքսյա Ավետիսյանի հոր՝ Անդրանիկ Պողոսյանի շահերը:

Իրավապաշտպան Ա. Սաքունցը yerkir.am-ի հետ զրույցում հայտնեց, որ որպես ներկայացուցիչ ներգրավվելու առաջարկը ստացել են Անդրանիկ Պողոսյանից: Նա հայտնեց, որ արդեն ծանոթացել են քննչական խմբի կողմից նշանակված փորձաքննություններին, դիմումներ են ներկայացրել որոշակի նյութ և որոշակի հարցերի վերաբերյալ պարզաբանումներ ստանալու համար: Մասնավորապես՝ հետաքրքրվել են՝ արդյո՞ք քննչական գործողություններ արվել են Պերմյակովի վրայից կրակոցների արգասիքի հետքեր հայտնաբերելու ուղղությամբ, եթե՝ ոչ` ինչո՞ւ, արդյո՞ք սահմանի խախտման վերաբերյալ քրեական գործ հարուցվել է, թե՞ ոչ:

Հիշեցնենք, որ վերջին հարցադրումը Ավետիսյանների մյուս իրավահաջորդների ներկայացուցիչ Երեմ Սարգսյանն արդեն ուղղել է քննչական մարմնին և սպասում է պատասխանի:

Սաքունցը նաև հայտնեց, որ իրենք հանդիպել են նաև Սարգսյանի հետ և նրա հետ համագործակցության պայմանավորվածություն ձեռք բերել:

Նշենք, որ օրերս ՀՀ քննչական կոմիտեում տեղի է ունեցել հանդիպում-քննարկում՝ Գյումրիում տեղի ունեցած 7 անձի սպանության գործով տուժողների իրավահաջորդների հետ: