Ի՞նչ է պարզվել Գյումրիի սպանդի գործով նշանակված դատակենսաբանական փորձաքննությամբ

Հունվարի 12-ին Գյումրիում 7 հոգանոց ընտանիքի սպանության գործով մի շարք փորձաքննությունների եզրակացություններ են ստացվել: Այս մասին այսօր լրագրողների հետ հանդիպման ժամանակ հայտնեց գործով տուժողի իրավահաջորդի ներկայացուցիչ Լուսինե Սահակյանը` նշելով, որ իրավահաջորդները ևս ներկա են եղել փորձաքննությունների անցկացմանը:

Նրա խոսքով՝ դատաձգաբանական փորձաքննության համաձայն՝ կրակոցներն արձակվել են Վալերի Պերմյակովին ամրակցված և դեպքի վայրում հայտնաբերված զենքից:

Բացի այդ` դատակենսաբանական փորձաքննությամբ պարզվել է, որ Պերմյակովի քրտինքը և դեպքի վայրում հայտնաբերված հագուստի ու կոշիկների վրա հայտնաբերված քրտինքն իրենց խմբային պատկանելությամբ նույնն են: Իսկ արդյո՞ք դրանք պատկանում են Վալերի Պերմյակովին, պարզ կարող է դառնալ դատագենետիկական փորձաքննության արդյունքում:

Փաստաբանի խոսքով` այս գործով ապացույցների մեծ մասը հայկական կողմի մոտ է: